«Олмалиқ КМК» АЖ томонидан Ўзбекистон Миллий матбуот марказида ОАВ вакиллари учун «Олмалиқ кон-металлургия комбинатида ёшлар сиёсати бўйича амалга оширилаётган ишлар» мавзусида матбуот анжумани ўтказилди.
Тадбир «Олмалиқ КМК» АЖ бошқарув раисининг ахборот сиёсати масалалари бўйича маслаҳатчиси Умида Қаршибоева томонидан очиб берилди.
Барчамизга маълум, Ўзбекистон Республикаси Президенти ташаббуси билан 2017 йилда мамлакатимизда Ўзбекистон Республикаси Ёшлар иттифоқи ташкил этилган. Таъкидлаб ўтиш лозимки, 2018 йилда саноат корхоналари орасида биринчилардан бўлиб, Олмалиқ кон-металлургия комбинатида Ёшлар иттифоқи етакчилар кенгаши ташкил этилган.
Маълум бўлишича, ҳозирги кунда Олмалиқ кон-металлургия комбинатида 38 мингдан ортиқ ишчи ходимлар меҳнат қилишмоқда, уларнинг 36 фоизини (13 672 нафар) ёшлар ташкил этади. Шунингдек, 150 дан ортиқ ёш мутахассислар раҳбарлик лавозимларига тайинланган. Жорий йил давомида олий ўқув юртларидан 27 нафар ёш мутахассислар комбинатга ишга қабул қилинган. 2021 йилнинг охирига қадар олий ўқув юртларни тамомлаган 70 дан ортиқ ёшларни ишга қабул қилиш режалаштирилган.
Матбуот анжумани давомида Олмалиқ кон-металлургия комбинати раҳбарияти томонидан ёшлар иттифоқининг фаолиятини янада қўллаб қувватлаш мақсадида комбинатнинг 18 та таркибий бўлинмаларида раҳбарнинг ёшлар масалалари бўйича ёрдамчиси — Ёшлар иттифоқи раиси жорий этилганлиги, ушбу лавозимлар биринчи ўринбосар даражасига тенглаштирилганлиги Олмалиқ КМК бошқарув раисининг ёшлар масалалари бўйича маслаҳатчиси, Ёшлар иттифоқи раиси Аброр Камилов томонидан маълум қилинди.
Эътиборли жиҳати, Олмалиқ кон-металлургия комбинатида ёшларни қўллаб-қувватлаш ва уларнинг касбий кўникмаларини ривожлантириш мақсадида бир қатор муҳим ишлар амалга оширилмоқда. Жумладан, Ёшлар иттифоқи етакчилар кенгаши қошида ёш мутахассислар техник кенгаши ҳамда «Ёш металлурглар», «Ёш бойитувчилар», «Ёш энергетиклар», «Ёш механиклар» клублари фаолияти ташкил этилган. Ҳозирги кунда, клублар аъзолари томонидан илгари сурилган 10 дан ортиқ инновацион таклифлар синовлардан муваффақиятли ўтиб, амалиётга татбиқ этилган. Шунингдек, раҳбар кадрлар захирасини шакллантириш ва раҳбарлик лавозимларига ёш мутахассисларни тайинлаш мақсадида «Ёш раҳбар» кўрик-танлови ўтказилган. Синовлардан муваффақиятли ўтган ёш мутахассислар раҳбарлик лавозимларига тавсия этилган.
Тадбир давомида ёшлар ижтимоий қўллаб-қувватлаш ва муносиб меҳнат шароитларини яратиш масалаларига ҳам алоҳида тўхталиб ўтилди. Комбинатимиз ёшларини ижтимоий жиҳатдан қўллаб-қувватлаш мақсадида ўнта кўп қаватли уйлар комбинатимизнинг юзлаб ёшларига имтиёзли равишда топширилди, деб маълумот берди «Олмалиқ КМК» АЖ бошқарув раисининг ходимлар билан ишлаш ва ижтимоий масалалар бўйича ўринбосари в.б. Беҳзод Салимов.
Матбуот анжумани ташкилотчилари томонидан жорий йилда комбинат Аҳоли бандлигига кўмаклашиш маркази Тошкент вилояти бошқармаси билан ҳамкорликда банд бўлмаган ёшлар ва хотин-қизларни ишчи касбга ўқитиш бўйича қисқа муддатли ўқув курслари ташкил этгани таъкидланди. Ҳудуддаги «Ёшлар дафтари»га киритилган 300 га яқин фуқаролар 28 турдаги касбларга ўқитилиб, вилоятда мавжуд саноат корхоналарга ишга жалб қилинган.
Комбинатнинг йил дастури доирасидаги яна бир хайрли ишларидан бири ишсиз ёшлар ва хотин-қизларга деҳқончилик қилишлари учун 50 сотихдан юқори ликвидли экин экиш мақсадида жами 250 гектар ер майдони ажратилганидир. Ёшлар бу имкониятлардан самарали ва унумли фойдаланиб, айни вақтда ҳосил етилиб, йиғим-терим ишлари бошлаб юборилган.
Олмалиқ кон-металлургия комбинати масъул ходимлари томонидан комбинатга ишга қабул қилиш шартлари ва бугунги кунда эҳтиёжи баланд бўлган касблари ҳакида ҳам маълумотлар берилди.
Онлайн тарзда ўтган тадбирда ОАВлари вакиллари ва блогерлар ўзларини қизиқтирган саволларига тўлиқ жавоб олишди.
Маълумот шериклик ҳуқуқи асосида тайёрланди.
Изоҳ (0)