Fransiya prezidenti Emmanuel Makronning Lion ko‘rgazmasiga tashrifi chog‘ida unga tuxum uloqtirgan shaxs majburan ruhiy kasalliklar klinikasiga joylashtirildi. Bu haqda mahalliy prokuraturaga asoslanib, BFM telekanali xabar berdi.
“Lion prokuraturasining iltimosiga binoan ushbu shaxs psixiatrik tekshiruvdan o‘tkazildi, natijada u kasalxonaga yotqizilishi kerak, degan xulosaga kelindi”, — deyiladi nazorat organida.
BFM ma’lumotlariga ko‘ra, u hozir Lion yaqinidagi Bron kommunasining Vinatier kasalxonasida. Telekanal qayd etishicha, hujumchi 19 yoshli talaba bo‘lib chiqqan. Voqeadan so‘ng yigit hibsga olingan va unga davlat hokimiyatini egallab turgan shaxsga qasddan zo‘ravonlik qilish moddasi bo‘yicha ayblov qo‘yilgan. Biroq ruhiy tekshiruvdan so‘ng, hukumat uni majburiy davolanishga yuborishga qaror qildi.
27-sentabr kuni Makron Lion shahridagi Eurexpo ko‘rgazmasida umumiy ovqatlanish va mehmonxona biznesini qo‘llab-quvvatlash haqida nutq so‘zlagan. Shundan so‘ng unga tuxum uloqtirishgan. Lyonmag nashri xabar berishicha, hujumchi tuxumni otishdan oldin “Yashasin inqilob” deb baqirgan. Tuxum Makronning yelkasiga urilgan, ammo sinmagan. Keyinroq voqea joyidan olingan tasvirlarda polda yotgan tuxum parchalari ko‘rinadi.
Avvalroq 8-iyun kuni Emmanuel Makronga fuqarolardan biri tarsaki tushirgan edi. Hodisa Fransiya janubi-sharqidagi Drom departamentining Ten-L’Ermitaj kommunasida o‘tkazilgan aholi bilan uchrashuvda sodir bo‘lgan.
Keyinroq Fransiya respublika prokurori Makronga tarsaki tushirgan 28 yoshli Damyen Tarelga to‘rt oylik qamoq jazosi berilganini ma’lum qildi.
Izoh (0)