“Tolibon” afg‘onistonliklarga soqol oldirishni taqiqladi, Ashraf G‘ani toliblarni qo‘llab-quvvatlashga da’vat etdi. Afg‘oniston yangiliklari

“Tolibon” Afg‘oniston aholisiga sartaroshxonalarda soqol oldirishni taqiqladi

“Tolibon” erkaklar sartaroshxonalariga mijozlarning soqollarini qirtishlab olib tashlashni taqiqladi. Ushbu taqiqni Afg‘oniston yangi hukumati shariat qoidalari bilan izohladi.

Tegishli buyruqlar Hilmand va Hirot viloyatlaridagi, shuningdek, Kobuldagi sartaroshxonalarga kelib tushgan.

Sartaroshxonalar egalari va xodimlarining so‘zlariga ko‘ra, mazkur taqiq ularning biznesini kasodga uchraganini bildiradi.

Ta’kidlanishicha, 2011-yilda toliblar hokimiyatdan chetlatilgach, sartaroshxonalar, birinchi navbatda, yoshlar orasida barqaror tarzda ommalashib ketgan edi.

Afg‘oniston sobiq prezidenti “Tolibon” bilan hamkorlikka da’vat etdi

Afg‘onistonning qochoq prezidenti Ashraf G‘anining Facebook’dagi sahifasida uning nomidan xalqaro hamjamiyatga qaratilgan “Tolibon” hukumatini qo‘llab-quvvatlashga qaratilgan da’vat paydo bo‘ldi.

“Xalqaro hamjamiyat afg‘on xalqidan o‘zini chetga olmasdan, joriy hukumat bilan hamkorlik qilishi kerak”, — deyilgan G‘anining postida.

“Ularga yordam bering, muzlatilgan mablag‘larni afg‘on xalqiga qaytaring va ularni (Afg‘onistonning yangi hukumatini) tan oling”, — deyilgan sobiq prezident xabarida.

Biroz vaqt o‘tgach, Afg‘oniston sobiq prezidentining Twitter sahifasida uning Facebook’dagi akkaunti avvalroq xakerlik hujumiga uchragani haqida xabar paydo bo‘ldi. G‘ani ogohlantirishicha, u akkauntini o‘z qo‘liga qaytarib olmagunicha, u yerdagi barcha postlarni ham haqiqatga to‘g‘ri keladi, deb hisoblash mumkin emas.

Toliblar Afg‘onistonga xalqaro reyslarni qayta tiklashni so‘radi

“Tolibon” aviakompaniyalardan Afg‘onistonga xalqaro reyslarni qayta tiklashni so‘radi. Toliblar hukumati aviakompaniyalar bilan to‘liq hamkorlik qilishga va’da berib va Kobul aeroportidagi muammolar hal qilinganini aytib, xalqaro parvozlarni qayta boshlashga da’vat etdi.

Afg‘oniston Tashqi ishlar vazirligi rasmiy vakili Abdulqahhor Balxiyning aytishicha, xalqaro reyslar to‘xtab qolishi natijasida afg‘onlar ish va o‘qish yuzasidan sayohat qilish imkoniyatidan mahrum bo‘lgan.

Hokimiyat tepasiga “Tolibon” kelganidan buyon aeroportdan cheklangan miqdorda gumanitar va yo‘lovchi reyslari amalga oshirilgan. Ammo tijoriy xizmatlar qayta boshlanganicha yo‘q, chunki aeroport o‘n minglab xorijliklar va afg‘onlarning tartibsiz evakuatsiya qilinishi natijasida yopilgan edi.

Keyinroq havo bandargohi Qatar va Turkiya texnik guruhlari hamkorligida ochildi. Hozir ba’zi aviakompaniyalar, shu jumladan, Pokiston xalqaro havo yo‘llari cheklangan xizmatlarni taklif qilmoqda, biroq chiptalar narxlari odatdagidan ko‘p barobar qimmatroq.

Qozog‘iston Afg‘oniston hukumati bilan aloqalarni yo‘lga qo‘yishga tayyor

Qozog‘iston Afg‘oniston yangi hukumati bilan ishchi aloqalarni o‘rnatishga tayyor, ammo ularni tan olish haqida hozircha gap bormayapti, dedi Qozog‘iston TIV rasmiy vakili Aybek Smadiyarov Respublikaning Kobuldagi elchisi Alimxan Yesengeldiyev va Afg‘oniston muvaqqat hukumati tashqi ishlar vaziri vazifasini bajaruvchi Amirxon Muttakiy o‘rtasida bo‘lib o‘tgan uchrashuvni izohlar ekan.

“Uchrashuvda Qozog‘iston Respublikasi nomidan afg‘on xalqiga gumanitar yordam berish va savdo masalalari muhokama qilindi. Bundan ortiq hech narsa yo‘q. Tan olish haqida hozircha gap bormayapti. Biz yangi hukumat bilan ishchi munosabatlarni yo‘lga qo‘yishga tayyormiz. Bu hozir ushbu mamlakat oldida turgan gumanitar masalalarni hal qilish uchun muhim”, — dedi Smadiyarov.

Sentabr boshida Qozog‘iston prezidenti Qosim-Jo‘mart To‘qayev respublika, birinchi navbatda, juda zarur gumanitar muammolarni hal qilish uchun yangi hukumat bilan konstruktiv ishchi aloqalarni yo‘lga qo‘yishga tayyorligini ma’lum qilgan edi.

Afg‘onistonda tez orada yangi namunadagi pasportlar beriladi

Afg‘oniston fuqarolari tomonidan avvalgi rejim davrida olingan pasportlarning barchasi amalda qoladi, ammo tez orada “Afg‘oniston islom amirligi” (mamlakatda hokimiyatni egallab olgan “Tolibon” o‘z-o‘ziga bergan nom) degan davlat nomi tushirilgan yangi namunadagi hujjatlar berila boshlaydi. Bu haqda muvaqqat hukumat axborot va madaniyat vaziri o‘rinbosari vazifasini bajaruvchi Zabihulla Mujohid ma’lum qildi.

So‘nggi vaqtlarda Afg‘onistonda pasportlar berilishi to‘xtatib qo‘yilgan edi, bu esa mamlakatning bir nechta shaharlarida ketma-ket namoyishlarni keltirib chiqargan edi. 20-sentabr kuni “Tolibon” rahbariyati A’lam G‘ulom Haqqoniyni Afg‘oniston IIV huzuridagi pasportlar berish masalalari bo‘yicha bosh boshqarmaning yangi boshlig‘i etib tayinlagan edi.