Toshkentdagi “Chorsu” bozorida hojatxonada saqlangan quruq meva, joynamoz, Qur’on oyatlari tushirilgan mato va kafanlik o‘g‘irlagan o‘ta xavfli retsidivist 8 yilga qamaldi

Toshkent shahridagi “Chorsu” bozorida hojatxonada saqlangan buyumlar o‘g‘irlandi, deya xabar qilmoqda “Yangi Davr”.

Qayd etilishicha, 2021-yil 2-aprel kuni soat taxminan 22:00 da o‘ta xavfli retsidivist takroran jinoiy sheriklari bilan oldindan jinoiy til biriktirib, Shayxontohur tumani “Chorsu” bozorida joylashgan hojatxona eshigini buzib, hojatxonaga g‘ayriqonuniy ravishda kirgan.

Ular ichkarida bo‘lgan 6 million so‘mlik besh qop bodom, 1 million so‘mlik to‘rt dona joynamoz, 10 metr mato, bir rulon sochiq, bir dona paranji, bir dona “Oyatal kursi” yozilgan choyshab, bir dona kafanlikni yashirin ravishda qo‘lga kiritib, voqea joyidan yashirinmoqchi bo‘lgan vaqtida Ichki ishlar organi tomonidan ushlanib, jinoyatni o‘ziga bog‘liq bo‘lmagan holda oxiriga yetkaza olmagan.

‌Sud hay’ati sudlanuvchining muqaddam sudlangani, o‘ta xavfli retsidivist deb topilgani, shuningdek, jabrlanuvchilarning davosi yo‘qligi, yetkazilgan zararning qoplangani kabi holatlarni e’tiborga olib, hukm qildi.

Ushbu shaxsga nisbatan Jinoyat kodeksining 25-moddasi, 169-modda 4-qismining “b” bandiga (o‘ta xavfli retsidivist tomonidan sodir etilgan o‘g‘rilik) asosan aybdor deb topilgan va unga nisbatan 8 yilga ozodlikdan mahrum qilish jazosi tayinlandi.