So‘x tumanida maktab direktori qo‘shni maktab o‘qituvchilari bilan o‘quvchi talashib janjallashdi

Farg‘ona viloyatining So‘x tumanidagi maktabda direktor va o‘qituvchilar o‘quvchi talashib janjallashgan, deb xabar bermoqda “Daryo” muxbiri.

Videolavhada maktab hovlisida bir necha odamning janjallashayotgani, ichki ishlar xodimi ularni ajratishga urinayotgani va bu holatni maktab o‘quvchilari tomosha qilayotgani aks etgan.

“Daryo” muxbirining aniqlik kiritishicha, ushbu holat joriy yilning 6-sentabr kuni So‘x tumanidagi 2-ixtisoslashtirilgan davlat umumta’lim maktabida o‘tkazilgan “Birinchi qo‘ng‘iroq” tadbiri vaqtida yuz bergan.

Qayd etilishicha, tumandagi "Qal’a" mahallasi hududida ikkita umumta’lim muassasasi — 3-maktab va 2-IDUM joylashgan. Mazkur mahallada yashovchi aksariyat ota-onalar farzandlari ixtisoslashtirilgan maktabda ta’lim olishini istagan va ularni birinchi sinfga 2-IDUMga olib borgan. 3-maktab direktori esa bu bolalar o‘zi rahbarlik qilayotgan maktabda o‘qishi kerakligini talab qilib qo‘shni maktabga borgan va o‘quvchi talashib janjal ko‘targan.

3-maktab direktori G.R. 2-IDUM o‘qituvchilariga nisbatan haqoratomuz so‘zlarni ishlatib, ularni o‘quvchilar va ota-onalar oldida kamsitgan, jamiyatda o‘rnatilgan tartib-qoidalarni qasddan mensimasdan, baqir-chaqir qilib, “Birinchi qo‘ng‘iroq” tadbirining tartibli o‘tishiga to‘sqinlik qilgan.

Ayni vaqtda holat yuzasidan So‘x tumani IIB profilaktika inspektorlari tomonidan tergovga qadar tekshiruv harakatlari olib borilmoqda.