Тошкентдаги «Чорсу» бозорида ҳожатхонада сақланган қуруқ мева, жойнамоз, Қуръон оятлари туширилган мато ва кафанлик ўғирлаган ўта хавфли рецидивист 8 йилга қамалди

Тошкент шаҳридаги «Чорсу» бозорида ҳожатхонада сақланган буюмлар ўғирланди, дея хабар қилмоқда «Янги Давр».

Қайд этилишича, 2021 йил 2 апрель куни соат тахминан 22:00 да ўта хавфли рецидивист такроран жиноий шериклари билан олдиндан жиноий тил бириктириб, Шайхонтоҳур тумани «Чорсу» бозорида жойлашган ҳожатхона эшигини бузиб, ҳожатхонага ғайриқонуний равишда кирган.

Улар ичкарида бўлган 6 миллион сўмлик беш қоп бодом, 1 миллион сўмлик тўрт дона жойнамоз, 10 метр мато, бир рулон сочиқ, бир дона паранжи, бир дона «Оятал курси» ёзилган чойшаб, бир дона кафанликни яширин равишда қўлга киритиб, воқеа жойидан яширинмоқчи бўлган вақтида Ички ишлар органи томонидан ушланиб, жиноятни ўзига боғлиқ бўлмаган ҳолда охирига етказа олмаган.

‌Суд ҳайъати судланувчининг муқаддам судлангани, ўта хавфли рецидивист деб топилгани, шунингдек, жабрланувчиларнинг давоси йўқлиги, етказилган зарарнинг қоплангани каби ҳолатларни эътиборга олиб, ҳукм қилди.

Ушбу шахсга нисбатан Жиноят кодексининг 25-моддаси, 169-модда 4-қисмининг «б» бандига (ўта хавфли рецидивист томонидан содир этилган ўғрилик) асосан айбдор деб топилган ва унга нисбатан 8 йилга озодликдан маҳрум қилиш жазоси тайинланди.