Qashqadaryo viloyatida sababsiz maktabga bormagan 51 nafar o‘quvchining ota-onasi jarimaga tortildi. Bu haqda “Daryo”ga xabar bergan viloyat IIB axborot xizmati rahbari Iroda Rasulovaning aytishicha, huquqbuzarlik Ichki ishlar vazirligi mas’ullari ishtirokidagi huquqbuzarliklar profilaktikasi kunida o‘tkazilgan reyd tadbirlarida aniqlangan.
Qayd etilishicha, viloyatda Ichki ishlar vazirligining mas’ul mutasaddilari ishtirokida huquqbuzarliklar profilaktikasi kunida huquqbuzarlarga qarshi kurashish tadbiri boshlangan.
“Shunga asosan ayni vaqtda viloyatda faoliyat olib borayotgan respublika ishchi guruhi bilan birgalikda vohadagi shahar va tumanlarda huquqni muhofaza qiluvchi hamda boshqa davlat idoralari hamkorligida payshanba kuni huquqbuzarliklar profilaktikasi kuni tashkil etilib, fuqarolarning sayyor qabullari, sud muhokamalari, jinoyatchilikning oldini olish borasida targ‘ibot-tashviqot ishlari, yo‘l harakati xavfsizligi bo‘yicha reydlar, fohishalik, ichkilikka ruju qo‘yish, giyohvandlikni odat qilgan shaxslar bilan profilaktik suhbatlar o‘tkazilmoqda”, — deydi Iroda Rasulova.
Mas’ulning ma’lumot berishicha, reydning birinchi kunida IIOda profilaktik hisobda turgan 1266 nafar shaxs va ularning oila a’zolari bilan profilaktik suhbatlar o‘tkazilgan. Davomat tadbirlari davomida sababsiz darsga kelmagan 51 nafar o‘quvchi va ularning ota-onalarga nisbatan ma’muriy choralar ko‘rilgan. Jami 8007 xonadon o‘rganilib, pasport viza qoidalarini buzgan 41 nafar shaxs aniqlanib, ulardan doimiy yoki vaqtincha yashash tartibini buzgan 13 nafariga ma’muriy bayonnomalar tuzilgan.
Aytilishicha, jamoat tartibini saqlash maqsadida tashkil etilgan patrullik yo‘nalishlari tomonidan 254 ta ov quroli tekshirilib, 30 ta obyektda videokuzatuv moslamalari o‘rnatilgan. Huquqbuzarlarga nisbatan ma’muriy bayonnomalar tuzilib, qidiruvda bo‘lgan bir nafar shaxs qo‘lga olingan.
Dehqonobod tumani IIB boshlig‘i o‘rinbosari Dilshod Mirzayevning ma’lumot berishicha, tuman IIB binosida tuman hokimi va prokuror, shuningdek, IIB boshlig‘i ishtirokida IIB xodimlari va mahalla mas’ullariga “Xavfsiz hudud” profilaktik tadbirining mazmun-mohiyati, tadbir doirasida qilinishi lozim bo‘lgan ishlar haqida tushuntirish berilgan.
“10 kun davom etadigan tadbirlarning birinchi kunida vazirligimizdan kelgan mas’ullardan Farrux O‘sarov hamda Muzaffar Asqarovlar Dehqonobod tumanida bo‘lib, tumandagi mavjud 97 maktabda davomat tadbirlarini o‘tkazdi. Profilaktika inspektorlari xizmat xonalarida bo‘lib, yaratilgan shart-sharoitni ko‘zdan kechirdi”, — deydi Dilshod Mirzayev.
Dilshod Mirzayevning qo‘shimcha qilishicha, Vazirlar Mahkamasi topshirig‘i bilan har bir tumanda qilinganidek, Dehqonobod tumanida ham 10 kishilik hushyorxona tashkil etilgan bo‘lib, tuman hokimi va prokuror, shuningdek, Ichki ishlar vazirligi mas’ullari mazkur hushyorxona sharoitini borib ko‘rgan.
“Mazkur hushyorxona jamoat joyida mast holda yurgan fuqarolar uchun mo‘ljallangan bo‘lib, fuqaroning mastlik holati tarqalib, jamiyatda o‘zgalarga xavf tug‘dirmaydigan holatga kelgunga qadar ushlab turishga mo‘ljallangan”, — deydi Dilshod Mirzayev hushyorxona tashkil etish maqsadi haqida gapirar ekan.
Eslatib o‘tamiz, avvalroq Qarshida bir guruh yigitlar ishtirokida ommaviy janjal yuz bergani, ulardan biri 19 yoshli yigitni pnevmatik to‘pponchadan yaralgani haqida xabar berilgandi.
Izoh (0)