Polsha O‘zbekistonga 250 ming doza COVID-19 vaksinasini yetkazib beradi. Bu haqda “Dziennik gazeta prawna” gazetasi bergan ma’lumotga tayanib, “Gazeta.uz” xabar berdi.
Avgustda Polsha harbiy havo kemalari polyak xizmatchilarni Afg‘onistondan evakuatsiya qilishi jarayonida O‘zbekiston hukumati o‘z havo hududidan foydalanishga ruxsat bergan edi.
Navoiydagi O‘zbekiston havo hududi evakuatsiya jarayonlari uchun tranzit nuqtasi vazifasini o‘tagan. Harbiy havo kemalari Kobul—Navoiy yo‘nalishida uchishi, u yerdan Varshavaga fuqarolik samolyotlari parvoz qilishi rejalashtirilgan edi.
Polsha prezidenti Anjey Duda va Prezident Shavkat Mirziyoyevning o‘zaro muloqotidan so‘ng Polsha harbiy havo kemalariga O‘zbekiston havo hududida uchishga ruxsat berildi.
Insonparvarlik yordami sifatida yetkazib berilishi kutilayotgan 250 ming doza vaksina O‘zbekistonga Polsha fuqarolarini Afg‘onistondan evakuatsiya qilishdagi hamkorligi uchun minnatdorchilik ramzidir.
“Biz shu kungacha ko‘plab mamlakatlarga yordam berdik. Ukrainaga, Vyetnamga, Avstraliyaga vaksinalar yetkazib berdik. Ba’zilari sotildi, ba’zilari xayriya qilindi. Siyosiy aloqalar va insonparvarlik zaruratlari nuqtayi nazaridan O‘zbekistonga ham vaksina yetkazib berishga qaror qildik”, — degan Polsha tashqi ishlar vaziri o‘rinbosari Rafav Pjidach “DGP”ga bergan intervyusida.
Xabarda aynan qaysi vaksina yetkazib berilishi haqida ma’lumot berilmagan.
Avvalroq Germaniyadan O‘zbekistonga koronavirusga qarshi yuqori samaraga ega 10 ming doza dori vositasi yetib kelgani to‘g‘risida xabar berilgandi.
Mavzuga doir: O‘zbekistonga AQShdan koronavirusga qarshi 3 mln dozadan ortiq Moderna vaksinasi keltirildi
Izoh (0)