Andijon viloyatida talabalikka tavsiya qilingan 10 ming 84 nafar abituriyentning 7 ming 532 nafari umumta’lim maktablari bitiruvchilari ekani ma’lum qilindi. Bu haqda “Daryo” muxbiri Umidjon Mamarasulov xabar bermoqda.
Viloyat xalq ta’limi boshqarmasi matbuot xizmatining aniqlashtirishicha, 2020/2021-o‘quv yilida viloyatdagi 764 ta umumta’lim maktabini 36 ming 488 nafar bitiruvchi tamomlagan bo‘lib, ularning 262 nafari muddatidan avval talabalikka qabul qilingan. Bitiruvchilarning 28 ming 39 nafari oliy ta’lim muassasalariga kirish uchun hujjat topshirib, test sinovlarida ishtirok etgan.“Davlat test markazi tomonidan e’lon qilingan natijalarni tahlil qilib chiqqanimizda bitiruvchilarimizning 7 ming 532 nafari talaba bo‘lish baxtiga muyassar bo‘lgan. O‘tgan yilda ushbu ko‘rsatkich 5 ming 411 nafarni tashkil etgan. Bu quvonarli, albatta. Yana bir jihatga e’tibor qaratadigan bo‘lsak, talabalikka tavsiya qilingan 10 ming 84 nafar abituriyentning 75 foizdan ortig‘ini maktab bitiruvchilari tashkil etmoqda. Qayd etish lozim, ayni paytdagi ko‘rsatkichlarimiz yakuniy xulosa emas. Boisi, kasbiy-ijodiy imtihoni bor yo‘nalishlarga ham mingdan ortiq bitiruvchimiz hujjat topshirib, imtihonlarda ishtirok etishgan. Ularning natijalari e’lon qilingandan so‘ng raqamlarda yana o‘sish kuzatilishi mumkin”, — deydi xalq ta’limi boshqarmasi boshlig‘i Azizbek Mirkomilov.
Qo‘shimcha qilinishicha, viloyatda 4 ta umumta’lim muassasasi bitiruvchilari OTMlarga kirishda 100 foizlik, yana 6 tasi esa 90 foizdan yuqori natijani qayd etgan.
Marhamat tumanidagi 3-davlat ixtisoslashtirilgan maktab internati direktori Mahfuza O‘rinovaning aytishicha, bu yil internatni tamomlagan 46 nafar bitiruvchining barchasi test sinovlaridan muvaffaqiyatli o‘tgan. Ularning 13 nafari davlat granti, qolgan 33 nafari esa to‘lov-shartnomasi asosida oliy ta’lim muassasalariga o‘qishga kirgan.Ta’kidlanishicha, ushbu muassasa bitiruvchilari o‘tgan yili ham 100 foizlik natijani qayd etgan. O‘shanda internatning 25 nafari bitiruvchisi talaba bo‘lgan edi.
“Bundan tashqari, Andijon va Xo‘jaobod tumanlaridagi 38- va 40-davlat ixtisoslashtirilgan maktab internatlari, Paxtaobod tumanidagi 37-ixtisoslashtirilgan davlat umumta’lim maktabi bitiruvchilarining barchasi, ya’ni 22 nafari davlat granti, 53 nafari esa to‘lov-shartnoma asosida OTMga qabul qilinib, 100 foizlik natijaga erishilgan. Andijon shahridagi Muhammad Yusuf ijod maktabi, Shahrixon tumanidagi 4-DIMI, Xo‘jaobod tumanidagi 23-IDUM, Baliqchi tumanidagi 38-DIMI, Paxtaobod tumanidagi 21-DIMI, Bo‘ston tumanidagi 26-DIMI, Andijon shahridagi 13-umumta’lim maktabi, Jalaquduq tumanidagi 3-umumta’lim maktab jamoalari ham 90 foizdan yuqori natijani qayd etgan”, — deydi Azizbek Mirkomilov.
Izoh (0)