Namangan viloyatining Uchqo‘rg‘on tumanida nuroniylar, o‘rta va yosh avlod hamda turli millat vakillari ishtirokida “Uch avlod uchrashuvi” bo‘lib o‘tdi. Bu haqda “Daryo” muxbiri Azizbek Abduvaliyev xabar bermoqda.
Bayramona bezatilgan tadbir manzilida viloyatning barcha shahar-tumanlari, yirik ishlab chiqaruvchilar, korxona va tashkilotlar, oliy o‘quv yurtlari o‘z ko‘rgazmalari bilan qatnashdi.
Namanganda faoliyat olib borayotgan milliy-madaniy markazlar, folklor jamoalarining chiqishlari namoyish etildi. Turli tillarda kuy-qo‘shiqlar, lapar va o‘lanlar yangradi.
Turfa taomlar, jumladan, Chust oshi, Norin somsasi, Mingbuloq balig‘i mehmonlarga tortiq qilindi.
Tadbirda Prezident maslahatchisi Tursunxon Xudoyberganov, Namangan viloyati hokimi Shavkat Abdurazzoqov, Qirg‘izistonning O‘zbekistondagi Favqulodda va muxtor elchisi Ibrohim Junusov, Tojikistonning O‘zbekistondagi Favqulodda va muxtor elchisi Abdujabbor Rahmonzoda so‘zga chiqdi.
Ular o‘z chiqishlarida uch avlod o‘rtasida mehr-oqibat va hurmat-izzat rishtalarini bog‘lash, chegaradosh davlatlar va hududlar o‘rtasidagi iqtisodiy va gumanitar aloqalarni yanada mustahkamlash masalalariga to‘xtalib o‘tdi.
Mustaqillikning 30 yilligiga bag‘ishlangan ushbu uchrashuvda Qirg‘iziston va Tojikistondan nufuzli delegatsiyalar ishtirok etdi. Jumladan, Qirg‘iziston delegatsiyasi tarkibidan mamlakat hukumatining Jalolobod viloyatidagi vakolatli vakilining birinchi o‘rinbosari, Axsi, Olabuqa, Navkent tumanlari hokimlari, tadbirkorlar, Tojikiston delegatsiyasi tarkibidan esa So‘g‘d viloyatining o‘zbeklar milliy markazi, mahalliy OAV rahbarlari o‘rin oldi.
“Uch avlod” uchrashuvi yosh xonandalar va taniqli san’at ustalarining konsert dasturi bilan davom etdi. Konsertning avj pallasi Qirg‘izistonning O‘zbekistondagi elchisi Ibrohim Junusov sahnaga chiqib, mikrofonni qo‘liga olgan paytga to‘g‘ri keldi.
Elchi ijrosidagi “Jon bolam” deb nomlangan qo‘shiq mehmon va mezbonlar tomonidan olqishlar bilan kutib olindi.
Tadbirdan so‘ng Qirg‘iziston va Tojikistondan kelgan mehmonlar Namangandagi bir qator yirik korxona va kompaniyalar faoliyati bilan tanishdi.
Izoh (0)