O‘zbekiston prezidentligi sayloviga Maqsuda Vorisova nomzodi tasdiqlandi

O‘zbekiston Xalq demokratik partiyasining 6-sentabr, dushanba kuni bo‘lib o‘tgan XII qurultoyida O‘zbekiston prezidentligiga partiya markaziy kengashi raisi o‘rinbosari, Oliy Majlis Qonunchilik palatasi deputati Maqsuda Vorisova nomzodi syezd delegatlarining ko‘pchilik ovozi bilan tasdiqlandi. Bu haqda “Daryo” muxbiri xabar bermoqda.

Qurultoyda 2021-yil 24-oktabr kuni bo‘lib o‘tadigan O‘zbekiston Prezidenti saylovi milliy saylov qonunchiligining yangi tamoyillari, umume’tirof etilgan xalqaro standartlar asosida, ochiq va shaffof o‘tkazilishi, saylov kampaniyasi davrida barcha siyosiy partiyalar va ular tomonidan ko‘rsatilgan nomzodlar uchun sog‘lom raqobat muhiti, teng sharoit yaratilishi zarurligi alohida ta’kidlandi.

Tadbirda XDPdan O‘zbekiston prezidentligiga nomzod ko‘rsatish to‘g‘risidagi masala atroflicha muhokama qilindi.

Delegatlar qurultoyda ko‘rib chiqish uchun tavsiya etilgan partiya markaziy kengashi raisi o‘rinbosari, Oliy Majlis Qonunchilik palatasi deputati Maqsuda Vorisovani partiyadan O‘zbekiston prezidentligiga nomzod sifatida tasdiqladi.

Qurultoyda Maqsuda Vorisova “Barchaga g‘amxo‘rlik davlatning burchidir!” shiori asosida to‘qqizta ustuvor yo‘nalishdan iborat saylovoldi dasturini e’lon qildi.

Ta’kidlanishicha, dastur loyihasining asosiy maqsadi mamlakatda ijtimoiy tenglik hamda xalq demokratiyasi mezonlariga mos bo‘lgan davlat va jamiyat barpo etishga qaratilgan. Xususan:

• aholining daromadiga qarab tabaqalashtirilgan soliq solish tizimini joriy etish;
• har bir insonning minimal ijtimoiy xizmatlarni bepul olishini qonunchilik darajasida kafolatlash;
• olis va chekka hududlarda shifokorlar hamda o‘qituvchilarga bo‘lgan ehtiyojni qoplash uchun “Qishloq shifokori” va “Qishloq o‘qituvchisi” dasturlarini amalga oshirish, ularni moddiy va ma’naviy rag‘batlantirish tizimini qonunchilik asosida mustahkamlash;
• aholining kam ta’minlangan qatlamlariga bepul, sifatli va to‘laqonli, shu jumladan profilaktika tibbiy xizmatlarni o‘z ichiga olgan tibbiy yordam ko‘rsatish;
• yoshlarning kasb-hunar tanlashi, bepul va sifatli ta’lim olishi, o‘quv muassasalarini tugatgandan so‘ng ishga joylashish kafolatini mustahkamlash;
• pensiya va ijtimoiy nafaqa oluvchilarning hayotiy ehtiyojlarini to‘laqonli qondirishni kafolatlaydigan pensiya va ijtimoiy ta’minotning maqbul tizimni shakllantirish;
• kam ta’minlangan, lekin boqimandalik kayfiyatida yurgan fuqarolarni jamiyatimizning faol ishtirokchisiga aylantirish;
• nogironligi bo‘lgan shaxslarga oid xalqaro me’yorlar va standartlarni milliy qonunchilikka implementatsiya qilish;
•  umumxalq ahamiyatiga ega iqtisodiyot tarmoqlarining boshqaruvida davlat ishtirokini mustahkamlash.

Qurultoy delegatlari nomzodning saylovoldi dasturini shakllantirish bo‘yicha bir necha oy davomida izchil ish olib borilgani, boshlang‘ich tashkilotlardan tortib, hududiy kengashlargacha takliflar shakllantirilgani, partiyaning ko‘p ming sonli fikri va qarashlari dasturda o‘z ifodasini topayotganini ta’kidlashdi.

Qurultoyda O‘zbekiston prezidentligiga Xalq demokratik partiyasidan ko‘rsatiladigan nomzodning saylovoldi dasturi tasdiqlandi.

Ma’lumot uchun, Maqsuda Vorisova 1961-yil Toshkent shahrida tug‘ilgan. Toshkent davlat tibbiyot institutini tamomlagan, mutaxassisligi bo‘yicha shifokor. 2018-yilda I darajali “Sog‘lom avlod uchun” ordeni bilan mukofotlangan.