Yer, bino va inshootlar masalalarida qator qonun va qarorlar hayotga tadbiq etilmoqdaki, ularning bajarilishi natijasida tizimda yangilanishlar, islohotlar amalga oshirilmoqda. Ayniqsa, yer va binolarni hujjatlashtirishda kadastr tizimida bo‘layotgan o‘zgarishlar aholi uchun qator qulayliklarni yaratmoqda. Ana shular haqida batafsil bilish uchun Kadastr agentligi Toshkent shahar boshqarmasi boshlig‘i Bekzod Tashxodjayev bilan suhbat uyushtirildi.
— Xabaringiz bor, davlat rahbari tomonidan chiqarilayotgan qonunlar, qarorlar barchasi xalq farovonligi, yurt tinchligi yo‘lida xizmat qilmoqda. Ammo ayrim fuqarolarimiz borki, o‘z imkoniyatlarini suiste’mol qilgan holda, noqonuniy tarzda yerlarni o‘zlashtirib, tadbirkorlik faoliyatini olib bormoqdalar
— To‘g‘ri aytasiz, so‘nggi yillarda yer munosabatlarida ko‘pgina o‘zgarishlar va yangiliklar bo‘layotganini kuzatishingiz mumkin. Yer munosabatlarida doimo qattiq nazorat zarur va har bir qarich yerdan unumli foydalanish maqsadida tegishli choralarni ko‘rib borish vaqt talabidir.
O‘zbekiston Respublikasi Prezidenti tomonidan 16.08.2021-yilda “Yer uchastkalarini ajratish va ulardan foydalanish, shuningdek, yerlarni hisobga olish va davlat yer kadastrini yuritish tizimining takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida”gi O‘RQ 708-sonli qonun imzolandi.
Unga ko‘ra, “Yer uchastkalarini o‘zboshimchalik bilan egallab olish, shu jumladan, ushbu yer uchastkalariga nisbatan qonuniy huquqlari mavjud bo‘lmagan holda ulardan foydalanish fuqarolarga bazaviy hisoblash miqdorining yigirma besh baravari, mansabdor shaxslarga esa ellik baravari miqdorida jarima solishga sabab bo‘ladi.
Bundan ko‘rinib turibdiki, ertami-kechmi noqonuniy egallangan yer uchun siz qonuniy javob berishingiz muqarrar. Bundan tashqari, o‘zboshimchalik bilan egallab olingan, ajratilgan yer uchastkasiga tutash bo‘lgan va tutash bo‘lmagan yer uchastkalarida qurilish ishlarini amalga oshirish fuqarolarga bazaviy hisoblash miqdorining bir yuz ellik baravar, mansabdor shaxslarga esa uch yuz baravari miqdorida jarima solishga sabab bo‘ladi.
— Ammo ular bilmagandim, xabarim yo‘q edi, degan vajlarni ko‘rsatishi bor gap
— Hozirgi kunda juda ko‘p uchratadiganimiz tadbirkorlik obyektlari oldida joylashgan qo‘shimcha yerlarni hech qanday hujjatsiz yoki hujjatlari qonuniy bo‘lmagan tarzda o‘zlashtirib, yana bir tadbirkorlik ishini bemalol boshlab, undan katta daromad olayotgan “ishbilarmonlar” ham talaygina. Biz egalik qilayotgan hududning atroflari ham bizga tegishli deb mulohaza qilishadimi, bilmadim, ammo baribir ular bu ishning xato ekanligini anglab turadilar. Shu bois, buni to‘g‘ri tushungan holda, yer uchastkasini qaytarib bersalar, ularga imtiyoz beriladi, ya’ni ushbu moddaning ikkinchi qismida nazarda tutilgan huquqbuzarlikni birinchi marta sodir etgan shaxs, agar u o‘zboshimchalik bilan egallangan yer uchastkasining qaytarilishini ta’minlasa va o‘zboshimchalik bilan egallab olishning oqibatlarini bartaraf etsa, javobgarlikdan ozod etiladi.
— Toshkent shahrida shunday holatlar kuzatildimi?
— Afsuski, bor. Mazkur qonun ijrosi bo‘yicha Kadastr agentligi Toshkent shahar boshqarmasida ham ishlar olib borilmoqda. Xususan, Toshkent shahri bo‘yicha qonunan o‘z vaqtida ro‘yxatdan o‘tkazilmagan 506 ta holat aniqlangan. O‘rganish va tekshirish natijasida, shundan 39 ta holat haqiqatan ham noqonuniy ekanligi aniqlanib, ular ma’muriy javobgarlikka tortilgan.
Islohotlar davrida yashamoqdamiz. Har bir soha kabi yer va bino masalalarida turli o‘zgarishlar va yangilanishlar kuzatilmoqda. Buning natijasida soha yuksalmoqda, fuqarolarga xizmat ko‘rsatish darajasi yanada oshmoqda. O‘z o‘rnida, mazkur qonunning hayotga tadbiq etilishi ko‘p jihatdan yer munosabatlarida o‘zboshimchaliklarga ham chek qo‘yilishiga xizmat qilmoqda, desam adashmagan bo‘laman.
Bekzod Tashxodjayev, Kadastr agentligining Toshkent shahar boshqarmasi boshlig‘i
Izoh (0)