Ер, бино ва иншоотлар масалаларида қатор қонун ва қарорлар ҳаётга тадбиқ этилмоқдаки, уларнинг бажарилиши натижасида тизимда янгиланишлар, ислоҳотлар амалга оширилмоқда. Айниқса, ер ва биноларни ҳужжатлаштиришда кадастр тизимида бўлаётган ўзгаришлар аҳоли учун қатор қулайликларни яратмоқда. Ана шулар ҳақида батафсил билиш учун Кадастр агентлиги Тошкент шаҳар бошқармаси бошлиғи Бекзод Ташходжаев билан суҳбат уюштирилди.
— Хабарингиз бор, давлат раҳбари томонидан чиқарилаётган қонунлар, қарорлар барчаси халқ фаровонлиги, юрт тинчлиги йўлида хизмат қилмоқда. Аммо айрим фуқароларимиз борки, ўз имкониятларини суистеъмол қилган ҳолда, ноқонуний тарзда ерларни ўзлаштириб, тадбиркорлик фаолиятини олиб бормоқдалар
— Тўғри айтасиз, сўнгги йилларда ер муносабатларида кўпгина ўзгаришлар ва янгиликлар бўлаётганини кузатишингиз мумкин. Ер муносабатларида доимо қаттиқ назорат зарур ва ҳар бир қарич ердан унумли фойдаланиш мақсадида тегишли чораларни кўриб бориш вақт талабидир.
Ўзбекистон Республикаси Президенти томонидан 16.08.2021 йилда «Ер участкаларини ажратиш ва улардан фойдаланиш, шунингдек, ерларни ҳисобга олиш ва давлат ер кадастрини юритиш тизимининг такомиллаштирилиши муносабати билан Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида»ги ЎРҚ 708-сонли қонун имзоланди.
Унга кўра, «Ер участкаларини ўзбошимчалик билан эгаллаб олиш, шу жумладан, ушбу ер участкаларига нисбатан қонуний ҳуқуқлари мавжуд бўлмаган ҳолда улардан фойдаланиш фуқароларга базавий ҳисоблаш миқдорининг йигирма беш баравари, мансабдор шахсларга эса эллик баравари миқдорида жарима солишга сабаб бўлади.
Бундан кўриниб турибдики, эртами-кечми ноқонуний эгалланган ер учун сиз қонуний жавоб беришингиз муқаррар. Бундан ташқари, ўзбошимчалик билан эгаллаб олинган, ажратилган ер участкасига туташ бўлган ва туташ бўлмаган ер участкаларида қурилиш ишларини амалга ошириш фуқароларга базавий ҳисоблаш миқдорининг бир юз эллик баравар, мансабдор шахсларга эса уч юз баравари миқдорида жарима солишга сабаб бўлади.
— Аммо улар билмагандим, хабарим йўқ эди, деган важларни кўрсатиши бор гап
— Ҳозирги кунда жуда кўп учратадиганимиз тадбиркорлик объектлари олдида жойлашган қўшимча ерларни ҳеч қандай ҳужжатсиз ёки ҳужжатлари қонуний бўлмаган тарзда ўзлаштириб, яна бир тадбиркорлик ишини бемалол бошлаб, ундан катта даромад олаётган «ишбилармонлар» ҳам талайгина. Биз эгалик қилаётган ҳудуднинг атрофлари ҳам бизга тегишли деб мулоҳаза қилишадими, билмадим, аммо барибир улар бу ишнинг хато эканлигини англаб турадилар. Шу боис, буни тўғри тушунган ҳолда, ер участкасини қайтариб берсалар, уларга имтиёз берилади, яъни ушбу модданинг иккинчи қисмида назарда тутилган ҳуқуқбузарликни биринчи марта содир этган шахс, агар у ўзбошимчалик билан эгалланган ер участкасининг қайтарилишини таъминласа ва ўзбошимчалик билан эгаллаб олишнинг оқибатларини бартараф этса, жавобгарликдан озод этилади.
— Тошкент шаҳрида шундай ҳолатлар кузатилдими?
— Афсуски, бор. Мазкур қонун ижроси бўйича Кадастр агентлиги Тошкент шаҳар бошқармасида ҳам ишлар олиб борилмоқда. Хусусан, Тошкент шаҳри бўйича қонунан ўз вақтида рўйхатдан ўтказилмаган 506 та ҳолат аниқланган. Ўрганиш ва текшириш натижасида, шундан 39 та ҳолат ҳақиқатан ҳам ноқонуний эканлиги аниқланиб, улар маъмурий жавобгарликка тортилган.
Ислоҳотлар даврида яшамоқдамиз. Ҳар бир соҳа каби ер ва бино масалаларида турли ўзгаришлар ва янгиланишлар кузатилмоқда. Бунинг натижасида соҳа юксалмоқда, фуқароларга хизмат кўрсатиш даражаси янада ошмоқда. Ўз ўрнида, мазкур қонуннинг ҳаётга тадбиқ этилиши кўп жиҳатдан ер муносабатларида ўзбошимчаликларга ҳам чек қўйилишига хизмат қилмоқда, десам адашмаган бўламан.
Бекзод Ташходжаев, Кадастр агентлигининг Тошкент шаҳар бошқармаси бошлиғи
Изоҳ (0)