Ҳозирда Ўзбекистонда «Спутник V»нинг биринчи дозаси билан эмланган фуқаролар вакцинанинг иккинчи дозасини ўз вақтида ололмаётгани кузатилмоқда. Ўзбекистон санитария-эпидемиологик осойишталик ва жамоат саломатлиги хизмати, вакциналар ва иммунопрофилактика бўлими бошлиғи Дилором Турсунованинг маълум қилишича, 30 август куни мамлакатга Россия вакцинасининг навбатдаги партияси олиб келинади. Бу ҳақда Инновацион ривожланиш вазирлиги ахборот хизмати хабар берди.
«Тўғри, ‘Спутник V’ вакцинасининг навбатдаги партиясини келтириш бўйича бироз ушланишлар кузатилмоқда. Айтишим мумкинки, 30 август куни мамлакатимизга ‘Спутник V’ вакцинаси келтирилади. Бундай савол билан кўплаб фуқаролар мурожаат қилмоқда. Ушбу вакцинанинг 1- ва 2-дозалари ўртасида 21 кун оралиқ белгиланган. Эндиликда 1- ва 2-чи дозаларининг ўртасидаги оралиқ узоқ муддатга чўзилгани сабабли вакцинанинг амал қилиш муддати тугади ёки бошқатдан олиш керак, деган гаплар аҳоли орасида кўпайди.
Вакцина билан эмланиш оралиғи камида 21 кун деб белгиланган бўлса, 12 ҳафтагача узайтирилиши ҳам зиён келтирмайди. Вакцина олиб келиниши билан 1-компонент билан эмланган барча фуқароларга 2-компоненти ҳам қилинади», — дейди Турсунова.
Эслатиб ўтамиз, шу кунга қадар 13,751 миллион дозадан ортиқ вакцинадан эмлаш жараёнларида фойдаланилди. Шунингдек, шу кунгача коронавирусга қарши тўлиқ эмланган фуқаролар 1 679 949 нафарни ташкил қилмоқда.
Мавзуга доир:
Изоҳ (0)