Respublika maxsus komissiyasi O‘zbekistonda Mustaqillik kuniga bag‘ishlangan bayram tadbirlarini o‘tkazishni ma’qulladi

Respublika maxsus komissiyasi tomonidan O‘zbekiston davlat mustaqilligining 30 yillik bayrami tadbirlarini ko‘tarinki ruhda o‘tkazish maqsadida Qoraqalpog‘iston Respublikasi, viloyatlar va Toshkent shahrida ochiq maydonlarda sayillar, konsert tomoshalari va ko‘ngilochar dasturlarni tashkil etish borasidagi tegishli tashkilotlar tomonidan berilgan takliflar ma’qullandi. Bu haqda Sog‘liqni saqlash vazirligi xabar berdi.

Ma’lum qilinishicha, mustaqillikning 30 yilligi bayramiga tayyorgarlik ko‘rish va uni yuqori saviyada o‘tkazishni ta’minlashga mas’ullar tomonidan bayram tadbirlariga tashrif buyuruvchilarni niqob taqishlari, ijtimoiy masofani saqlashlari, shaxsiy gigiyena qoidalariga qat’iy rioya etish ustidan nazoratni kuchaytirishni ta’minlash shartligi belgilangan.

Shu o‘rinda Sog‘liqni saqlash vazirligi bayram tadbirlari o‘tkaziladigan maydonlarda, shuningdek, tashkilot, korxona, muassasalarda, yirik savdo majmualari, supermarketlar, ko‘ngilochar muassasalarda niqobda bo‘lish, ijtimoiy masofani saqlash, tana haroratini o‘lchash amaliyotlariga rioya etilishini so‘rab qoladi.

Avvalroq O‘zbekistonda prezident saylovi munosabati bilan ayrim ommaviy tadbirlar o‘tkazilishiga ruxsat berilgandi.