Germaniya Kobuldagi afg‘on fuqarolarini Toshkent orqali evakuatsiya qilishni to‘xtatdi

Germaniya Harbiy havo kuchlariga tegishli samolyot Islom Karimov nomidagi xalqaro aeroportga qo‘nishni amalga oshirdi. Bu haqda Telegram’dagi “Novosti Tashkentskogo neba” kanali xabar berdi.

Ma’lum qilinishicha, Airbus A-400M Atlas samolyoti Kobul—Toshkent yo‘nalishi bo‘yicha so‘nggi gumanitar reysini amalga oshirgan. Germaniya hukumati Afg‘onistondagi fuqarolarni olib chiqish operatsiyalarini xavfsizlik nuqtayi nazaridan to‘xtatganini e’lon qildi.

Eslatib o‘tamiz, 17-avgust kuni Germaniya Qurolli Kuchlarining (bundesver) ikkinchi evakuatsiya samolyoti 125 nafar yo‘lovchi bilan Afg‘onistondan Toshkentga uchib kelgan. Samolyot Kobuldan havoga ko‘tarilishi bilan Germaniya Mudofaa vazirligi Twitter’dagi sahifasiga Airbus A400M Kobuldan Toshkentga qaytayotgani haqida xabar qilgan.

Xabarda, bortda Germaniya fuqarolari, mahalliy afg‘on xodimlari hamda “himoyaga muhtoj boshqa shaxslar” borligi ta’kidlangan. “Aviatashuvlar boshlandi va bu xavfsizlik bilan bog‘liq vaziyat taqozo etguniga qadar davom etadi”, — deb yozgandi Germaniya tashqi ishlar vaziri Xayko Mas.

Germaniya mudofaa vaziri Annegret Kramp-Karrenbauer esa Afg‘onistondan amalga oshirilayotgan evakuatsiya xavfli missiya ekani, biroq bundesverda malakali xodimlar borligini ma’lum qilgan. Germaniya 22-avgust kuniga qadar Toshkent orqali Afg‘onistondan 2 mingdan ortiq fuqaroni evakuatsiya qildi.