Ўзбекистон етти ой ичида хориждан 1,4 млн дона мобил телефон импорт қилган
2021 йилнинг январь—июль ойларида Ўзбекистон хориждан қиймати 94,3 миллион АҚШ долларига тенг бўлган 1,4 миллион дона мобил телефонлар импорт қилган. Бу ҳақда Давлат статистика қўмитаси хабар берди.
Фото: «Дарё»
Таъкидланишича, телефон импорти ўтган йилнинг мос даври билан солиштирилганда 1 миллион донага ошган.
Ўзбекистон 11 та давлатдан мобил телефонлар импорт қилган бўлиб, уларнинг энг кўпи қуйидаги мамлакатлардан амалга оширилган:
Хитой – 896,4 минг дона
Вьетнам – 257,5 минг дона
БАА – 148,8 минг дона
Ҳиндистон – 48,6 минг дона
Қозоғистон – 45,0 минг дона
Россия – 967 дона
Жанубий Корея – 700 дона
Аввалроқ Ўзбекистонда мобил алоқа абонентлари сони 27 миллион нафарга яқинлашгани, Ўзбекистон мобил интернет арзонлиги бўйича дунё рейтингида 21-ўринни эгаллагани тўғрисида хабар берилганди.
Эслатиб ўтамиз, Ўзбекистондаги мобил телефонлар махсус IMEI коди бўйича рўйхатга олиниши тартиби 2019 йил 1 апрелдан жорий этилган. 2020 йил 22 сентябрь куни мобил қурилмаларнинг IMEI кодларини рўйхатдан ўтказиш тизими маъмурияти томонидан мобил қурилмаларни UzIMEI тизимида рўйхатдан ўтказиш жараёнига ўзгартириш киритилган, унга кўра, қурилманинг IMEI кодини/кодларини рўйхатдан ўтказишда жисмоний шахслар томонидан фойдаланиладиган абонент рақами маҳаллий мобил операторларидан ариза берувчи номига расмийлаштирилган бўлиши кераклиги белгиланганди. Қатор ОАВ ва блогерлар мазкур ўзгариш қонунга зид равишда амалга оширилган бўлиши мумкинлигини билдирган.
Изоҳ (0)