Pandemiyaga tayyorlanish va unga nisbatan choralar ko‘rish masalasida kuz oylari o‘ta ahamiyatli bo‘ladi. Bu haqda Jahon sog‘liqni saqlash tashkiloti (JSST) rahbari Tedros Gebreyesus Jenevadagi brifingda aytib o‘tdi, deb yozadi “RBK”.
Foto: “RIA Novosti”
“Keyingi uch oy bo‘lajak pandemiyaga tayyorgarlik ko‘rish va unga javob choralarini belgilash uchun muhim davr bo‘ladi”, — dedi JSST rahbari.
Gebreyesusning qo‘shimcha qilishicha, butun dunyoda kunlik kasallanish va o‘lim holatlariga oid vaziyat barqarorlashdi. “Ammo bu barqarorlik juda yuqori darajada — 4,5 milliondan ortiq kasallanish va 68 000 o‘lim holati”, — deya xulosa qildi u.
JSST ekspertlarining Nature jurnaliga yozgan maqolasida ma’lum qilishicha, COVID-19 pandemiyasining kelib chiqishini aniqlash jarayoni to‘xtatildi.
“Biz SARS-CoV-2 virusining kelib chiqishini tushunish uchun JSST va Xitoydan mustaqil xalqaro guruh a’zolari sifatida tanlangandik. Bizning hisobotimiz shu yilning mart oyida chop etilgan. U to‘xtab qolgan jarayonning birinchi qadami bo‘lgan bo‘lishi kerak”, — deya qayd etdi ekspertlar.
“SARS-CoV-2 ning kelib chiqishi bo‘yicha tekshiruv hal qiluvchi nuqtada ... eng muhimi: Xitoyda va undan tashqarida odamlar va hayvonlarning biologik, hayotiy jarayonlarini kuzatish imkoniyatlari darchasi juda tez yopilmoqda,” — dedi ekspertlar.
Ularning aytishicha, pandemiyaning birinchi ma’lum episentri hisoblanuvchi Xitoyning Uxan shahrida olib borilgan tekshiruv paytida to‘plangan ma’lumotlar COVID-19 laboratoriyadan sizib chiqqanini tasdiqlamaydi.
Mutaxassislar ushbu versiya ustida ishlashning o‘rniga, 2019-yil dekabrgacha antitanalar mavjudligi va kasallanish holatlari haqidagi dastlabki xabarlarni tekshirish orqali Xitoyda va undan tashqarida COVID-19 ning dastlabki holatlarini izlashga chaqirdi. Shuningdek, JSST xodimlari yovvoyi hayvonlar saqlanadigan xo‘jaliklarni tekshirish va ko‘rshapalaklarni o‘rganish zarur deb hisoblaydi. Biroq, JSST bu nuqtayi nazardan vaqt omilining ahamiyatini ta’kidladi.
“SARS-CoV-2 ga qarshi antitanalar vaqt o‘tishi bilan kamayadi, shuning uchun 2019-yil dekabrgacha virusga chalingan bo‘lishi mumkin bo‘lgan odamlarning namunalarini yig‘ish va sinovdan o‘tkazish bundan keyin tobora kamroq natija beradi” — deb ogohlantirdi JSST.
Ular, shuningdek, tekshiruv uchun qiziq bo‘lishi mumkin bo‘lgan yovvoyi hayvonlar boqilgan ko‘plab fermalar allaqachon yopilgan, hayvonlar esa o‘ldirilgan bo‘lishi mumkinligini aytdi.
G‘arb ommaviy axborot vositalari, JSST xodimlarining maqolasidan ikki hafta oldin, tashkilot Xitoyni COVID-19 ning eng birinchi holatlari haqida ma’lumot berishga chaqirganini eslatmoqda. JSST xodimlarining ta’kidlashicha, gap 2019-yil dekabr oyida mavjud bo‘lgan 174 ta holat haqida bormoqda, ular to‘g‘risida Xitoy hukumati ilgari aytishni istamagan.
Xitoy AQShni COVID-19 laboratoriyadan sizib chiqqani haqidagi versiyani targ‘ib qilishda ayblamoqda
25-avgust kuni Xitoy Xalq Respublikasi Tashqi ishlar vazirligining qurol-yarog‘ nazorati boshqarmasi bosh direktori Fu Tsun COVID-19 ning kelib chiqishi bo‘yicha tekshiruv to‘xtab qolganidan afsus bildirdi. Fu Tsunning so‘zlariga ko‘ra, bunda ushbu ilmiy ishni har doim qo‘llab-quvvatlagan Xitoyning aybi yo‘q.
Pekinda ta’kidlanishicha, Xitoy tekshiruv virusning boshqa mamlakatlardagi boshqa ehtimoliy manbalariga qaratilishini istaydi.
Fu Tsun, shuningdek, AQShni COVID-19 pandemiyasida Pekinni aybdor qilishga urinayotganlikda aybladi. Uning ta’kidlashicha, AQSh virusning laboratoriyadan oqishi nazariyasini atay targ‘ib qilmoqda. Fu Tsun, shuningdek, AQShning o‘zi ham JSSTni bir qator Amerika ilmiy-tadqiqot laboratoriyalarini o‘rganishga taklif qilishi kerakligini aytdi.
Avvalroq AQSh razvedka xizmati prezident Jo Baydenga koronavirusning kelib chiqishi haqidagi maxfiy hisobotni taqdim etgandi. Qayd etilishicha, hisobot xulosalari “tugallanmagan”. COVID-19 hayvondan yuqa boshlaganmi yoki odamdanmi, virus tabiiy kelib chiqqanmi yoki Uxandagi laboratoriyada yaratilganmi — razvedka xizmatlari yetarlicha ma’lumot topa olmagan.
