Ma’lum qilinishicha, 30-iyul kuni Uchtepa tumani KHAY ko‘chasida o‘tkazilayotgan maxsus reyd tadbirida YPX inspektori tomonidan oq rangli Nexia-3 rusumli avtoulovga to‘xtash ishorasi berilgan, biroq haydovchi YPX inspektorining qonuniy talabiga bo‘ysunmasdan o‘z harakatini davom ettirgan. Ko‘rilgan chora-tadbirlar natijasida mazkur transport vositasi KHAY va Farhod ko‘chalari kesishmasida to‘xtatilgan.
YPX inspektori tomonidan tekshirilganda transport vositasi haydovchisi 1996-yilda tug‘ilgan E.Madina avtotransport vositasini texnik qayd etish guvohnomasidan tashqari boshqa hujjatlarni taqdim eta olmagan. Javobgarlikdan qochib qutulish maqsadida E.Madina va uning ukasi 1999-yilda tug‘ilgan E.Umid IIO xodimlarining faoliyatiga to‘sqinlik qilib, janjal ko‘targan.
Ushbu fuqarolarga nisbatan Ma’muriy javobgarlik to‘g‘risidagi kodeksning tegishli moddalariga asosan ma’muriy bayonnoma rasmiylashtirilib, avtoulov vaqtincha jarima maydonchasiga joylashtirilgan va huquqbuzarlik sodir etgan shaxslarga nisbatan sud tomonidan tegishli jazo choralari qo‘llangan.
IIV YHXBB axborot xizmatining ma’lum qilishicha, 30-iyul kuni Jinoyat ishlari bo‘yicha Uchtepa tumani sudi tomonidan ushbu fuqarolar Ma’muriy javobgarlik to‘g‘risidagi kodeksning 194-moddasi 1-qismida nazarda tutilgan huquqbuzarlikni sodir etganlikda aybli deb topilgan. Ularning har biriga BHMning ikkidan bir qismi, ya’ni 122,5 ming so‘m miqdorida jarima jazosi belgilangan.
Shuningdek, Toshkent shahar IIBB YHXB ma’muriy materiallarni ko‘rib chiqishga mas’ul xodim tomonidan haydovchi ayolga nisbatan Ma’muriy javobgarlik to‘g‘risidagi kodeksning 135-moddasi (yo‘l harakati qoidalarida nazarda tutilgan hujjatlari bo‘lmagan shaxslarning transport vositalarini boshqarishi) 2-qismi tartibida BHMning 5 baravari miqdorida jarima belgilangan.
O‘tkazilgan tekshiruv jarayonida E.Madinaning hech qaysi vazir o‘rinbosariga aloqasi yo‘qligi aniqlangan.
“Shu o‘rinda fuqarolarga eslatib o‘tamiz, birovning nomini sotib, o‘zini kimningdir qarindoshi deb tanishtirish, janjal ko‘tarish orqali javobgarlikdan qochib qutulib bo‘lmaydi. Qonun oldida barcha barobar”, — deyiladi bayonotda.
Avvalroq Olmaliqda YPX xodimi “25 marta radarga to‘lagan” qoidabuzar ayolni “Abdurazzoq aka”dan bo‘lgan qo‘ng‘iroq sabab qo‘yib yuborgani to‘g‘risida xabar berilgandi.
Izoh (0)