Andijonda 2021-yilning o‘tgan 6 oyida sodir bo‘lgan YTHlar oqibatida 49 kishi vafot etgani ma’lum qilindi

Andijon viloyatida 2021-yilning o‘tgan olti oyi davomida sodir bo‘lgan yo‘l-transport hodisalari oqibatida 49 kishi vafot etgan, 284 nafar fuqaro esa turli darajada tan jarohati olgan. Bu haqda viloyat YHXB axborot xizmati ma’lumotiga tayanib, “Daryo” muxbiri xabar berdi.

Ma’lum qilinishicha, 2021-yilda yo‘l-transport hodisalari va ularning oqibatida jabrlanganlar soni o‘tgan yilning shu davriga nisbatan oshgan. Joriy yilning olti oyi davomida 333 ta yo‘l-transport hodisasi sodir etilgan bo‘lib, oqibatda 49 kishi vafot etgan, shuningdek, 284 nafar fuqaro turli xil og‘ir tan jarohati olib, shifoxonaga yotqizilgan. Natijada YTHlar 118 foizga, vafot etganlar 11,4 foizga, turli tan jarohatlari olganlar esa 113 foizga oshgan.

Qayd etilishicha, 2020-yilning olti oyi davomida Andijonda 215 ta yo‘l-transport hodisasi yuz bergan bo‘lib, oqibatda 44 kishi vafot etgan. 171 nafar fuqaro esa turli darajadagi jarohati olib, shifoxonaga yotqizilgan.

“YTHlarga haydovchilarning yo‘llarda yo‘l harakati qoidalari talablariga va belgilangan tezlikka rioya qilmasligi sabab bo‘lmoqda. Bunday salbiy holatlarning oldini olish borasida viloyat Yo‘l harakati xavfsizligi boshqarmasi tomonidan yo‘llarda xodimlarning xizmat olib borishlari tashkil etilmoqda. Biroq butun shaxsiy tarkib bilan viloyat hududidagi barcha yo‘llarni qamrab olish hamda yo‘l-patrul xizmati xodimlarining xizmatini tashkil etish va nazoratini olib borish imkoni bo‘lmaganligi inobatga olinib, avtomatik onlayn tarzda ishlovchi hamda tezlikni aniqlash imkoniyatiga ega foto-video fiksatsiyali kameralar o‘rnatilmoqda. Shu kunga qadar boshqarma tasarrufida 10 ta multiradar va 4 ta Autocon qurilmalari mavjud edi. Kuni kecha viloyat hokimligi yordami bilan yana bir dona Autocon tezlikni o‘lchash moslamasi keltirildi. Shu bilan boshqarma ixtiyorida bunday rusumdagi moslamalar soni 5 taga yetdi. Mana shunday zamonaviy tezlikni o‘lchash uskunalari yuz berishi mumkin bo‘lgan noxush holatlarning oldini olishga xizmat qilishi, shubhasiz”, — deydi viloyat Yo‘l harakati xavfsizligi boshqarmasi boshlig‘i Saidolim Zingirov.

Avvalroq Andijonda so‘nggi 3 yilda necha nafar haydovchi tezlikni oshirib, fotoradarlarga tushgani ma’lum qilingandi.