Toshkent shahrida o‘tkazilgan tungi reydlarning birida YPX xodimlarining qonuniy talablariga bo‘ysunmasdan, janjal ko‘tarib, “zamministr”ning ikkinchi xotini ekanligini aytgan qoidabuzar haydovchi yosh aktrisa Madina Eshonqulova ekanligi ma’lum bo‘ldi. Bu haqda rejissor, aktyor va prodyuser Ahad Qayum Instagram’dagi sahifasida aytib o‘tdi.

“Navbatdagi murojaatim kecha kechqurun tarqalgan video qahramoni — men ‘zamministr’ning ikkinchi xotiniman, deb aytgan ayol haqida bo‘ladi. U shou-biznes ichida yurgan, serial va filmlar ichida yurgan Madina degan qiz. U hozir bitta serialda suratga tushyapti. Serialda Madinaning ‘zamministrning ikkinchi xotiniman’, degan gapi bor. O‘shaning emotsiyasida yangi obrazidan xursand bo‘lib gapirib yuruvdi, yonidagi bola haqiqatan ham ukasi. Vaziyatdan jahli chiqib, YPX xodimlari oldida shu gapni gapirib yuborgan. Hech qanday boshqa muammo yo‘q”, — deydi Ahad Qayum.

Shuningdek, Madina Eshonqulova ham Instagram’dagi sahifasi orqali o‘zi ishtirokidagi videoni tarqatib, uni “zvezda” qilayotgan blogerlarga murojaat yo‘lladi.

“Hurmatli blogerlar, meni internetda aylantirib, “zvezda” qilayotganlaring uchun mingdan ming rahmat”. Virtual hayotdan tashqarida Xudo xohlasa, albatta, ko‘rishamiz. Hozircha internetda men bilan birga bo‘lib turinglar.

Kim meni qancha muhokama qilmasin, meni bilgan biladi, bilmagan o‘zi biladi. Men uchun buning umuman qizig‘i yo‘q. Chunki mening qornimni ular to‘yg‘azmaydi, hayotimni ular yashamaydi. Jon meniki, hayot meniki, qanday xohlasam shunday yashayman”, — deydi Madina Eshonqulova.