UzAuto Motors’ning sobiq rahbari “O‘zavtosanoat” tarkibidagi boshqa kompaniyaga rahbar bo‘ldi

Shvetsiyalik Bu Andersson UzAuto Motors bosh direktori etib tayinlangani haqida xabar berilgan edi. Kompaniyaga 2018-yildan buyon rahbarlik qilib kelgan Rustam Rajabov ham 23-avgust kuni yangi lavozimga tayinlandi.

UzAuto Motors matbuot xizmatining ma’lum qilishicha, u “O‘zavtosanoat” tomonidan tijoriy texnikalar ishlab chiqaruvchi korxonalarni boshqaruvchi kompaniya — Commercial Vehicles Management’ga bosh direktor bo‘ldi.

UzAuto Commercial Vehicles Management boshqaruv kompaniyasi bo‘lib, tijorat transport vositalari (yuk mashinalari, tirkamalar va yarim tirkamalar, avtobuslar va boshqa transport vositalari) ishlab chiqaradigan korxonalarga, shuningdek, zamonaviy qishloq xo‘jaligi texnikasi (ekin traktorlari, paxta terish mashinalari, g‘alla va yem-xashak yig‘ish mashinalari, tirkamalar, kultivatorlar va boshqalar)ni ishlab chiqaradigan korxonalar uchun umumiy boshqaruvni amalga oshiradi.

Kompaniyaning quyi tuzilmasiga SamAuto, JizzakhAuto, UzAuto Trailer, UzTruck & Bus va boshqalar kiradi.