Tana harorati yuqori bo‘lgan va koronavirusga chalingan abituriyentlar uchun qo‘shimcha test sinovlari 2021-yil 23-avgust kuni bo‘lib o‘tadi. Bu haqda Davlat test markazi xabar qildi.
Unda quyidagi toifadagi abituriyentlar ishtirok etishlari mumkin bo‘ladi:
- test sinoviga kelgan vaqtda tana harorati 37º C dan yuqori ekani aniqlangan va tegishli dalolatnoma rasmiylashtirilgan abituriyentlar;
- 16-avgustga qadar koronavirusga chalingani sababli qo‘shimcha test sinovlarida ishtirok etish uchun ariza bilan murojaat qilgan va Sanitariya-epidemiologik osoyishtalik va jamoat salomatligi xizmati tomonidan koronavirusga chalingani tasdiqlangan abituriyentlar.
Test sinovlari barcha hududlarda tashkil etiladi va abituriyentlar ro‘yxatdan o‘tish vaqtida test topshirish hududi sifatida o‘zlari tanlagan hududda test sinovida ishtirok etadi.
Abituriyentlar test sinovida ishtirok etish uchun ruxsatnomani Sanitariya-epidemiologik osoyishtalik va jamoat salomatligi xizmati tomonidan tegishli ma’lumotlar Davlat test markaziga taqdim etilgandan so‘ng 21-avgust kunidan boshlab my.dtm.uz sayti orqali yuklab olishlari mumkin bo‘ladi.
Izoh (0)