“O‘zgidromet” Sirdaryoda tornado kuzatilgani haqidagi video yuzasidan ma’lumot berdi.
Ijtimoiy tarmoqlarga joylashtirilgan hamda “Sirdaryoda tornado” deb nomlangan videolavha 2021-yilning 16-avgustida Sirdaryo viloyatida kuzatilgan. Lavhada mahalliy kuchli shamol – shamol yo‘nalishi o‘zgarishi bilan uning qisqa muddatli keskin kuchayishi va shu bilan birga quyun samarasining vujudga kelishi tasvirga olingan. Bu mahalliy tilda girdob deyiladi.
Ta’kidlanishicha, tornado yoki quyun – juda kuchli, haddan tashqari katta tezlik bilan aylanadigan voronkasimon quyun bo‘lib, to‘p-to‘p yomg‘irli (momaqaldiroqli) bulutlarda hosil bo‘ladi Pastga tomon bulutli yeng yoki xartum sifatida uyirma hosil qiladi va diametri bir necha o‘n yoki yuz metr bo‘lishi mumkin.
Tornadolar o‘ta halokatli tabiat hodisasidir. Asosan, tropik va subtropiklardagi okean va quruqlik o‘rtasida yuzaga keladi.
“Yuqoridagi videoda aks etgan hodisaning dahshatli tornado tabiat hodisasiga aloqasi yo‘q. Umuman olganda, O‘zbekistonda tornado hodisasi muqaddam kuzatilmagan. Girdob (smerch)lar yoz oylarida respublikaning turli hududlarida tez-tez kuzatiladi”, – deyiladi xabarda.
Bundan avval O‘zbekistonda hafta oxirlariga borib havo harorati yana ko‘tarilishi kutilayotgani haqida xabar berilgandi.
Izoh (0)