“Jinoyat kodeksiga Kelajakka xiyonat bobini qo‘shish kerak” — Alisher Qodirov

Oliy Majlis Qonunchilik palatasi spikeri o‘rinbosari, “Milliy tiklanish” partiyasi rahbari Alisher Qodirov Oqqo‘rg‘ondagi bog‘chada 25 nafar bola zaharlangani haqidagi xabarlardan so‘ng Jinoyat kodeksiga Kelajakka xiyonat bobini kiritish taklifi bilan chiqdi.

U ta’lim-tarbiya kelajak shakllanadigan soha ekanligini ta’kidlab, sohada kelajakka xiyonatchilar ham aralashib yurganini aytib o‘tgan.

“Bolaning sog‘lom, tarbiyali va bilimli bo‘lishini tashkil qilishdek mas’uliyat yuklangan inson bolalar ozuqasini o‘g‘irlasa, sifatlisini vijdonsizlarcha o‘zi yeb, bolalarga qoldiqlarini yoki eskiroqlarini yedirib yuborsa. Bilim o‘rniga bolalar tafakkuriga ‘xatolar paketi’ yoki ‘bo‘shliq’ni joylasa. Pulini olib, qulab tushadigan ko‘prikni loyihalaydigan muhandisga ‘a’lo’ni bosib bersa… bu toifa inson bu qadar mas’uliyatli joyda nima qilib yuribdi, degan savol tug‘ilishidek tabiiy nima bor?”, — deydi deputat.

Alisher Qodirov Kelajakka xiyonat bobida bolalar bog‘chasi, maktab va oliygohlarda “vazifasiga xiyonat qilayotganlar, bolalarning haqqi va vaqtini o‘g‘irlayotganlarga” nisbatan choralar belgilanishini taklif qilgan.

“Takror aytaman, bu sohada qahramonlar ishlashi kerak. Va ularning maoshlari ham, mehnat sharoitlari ham eng yuqori darajada bo‘lishi shart”, — deya so‘zini yakunlagan u.