Rossiyada MDH mamlakatlarining 700 mingdan ortiq fuqarolari noqonuniy yashamoqda. Bu haqda Rossiya ichki ishlar vaziri o‘rinbosari Aleksandr Gorovoy Ozarbayjon, Armaniston, Belarus, Qozog‘iston, Qirg‘iziston, Moldova, Tojikiston, Turkmaniston, O‘zbekiston va Ukraina elchilari bilan uchrashuvda ma’lum qildi, deb yozadi “RBK”.
Politsiyada eslatishlaricha, aprelda idora noqonuniy muhojirlarga hisobga turish va ruxsatnomalarni olish uchun hududiy politsiya organlariga murojaat qilishni tavsiya etgan edi.
“Shunga qaramay, chet el fuqarolarining hammasi ham IIVga murojaat qilishga shoshilmayapti. Bugungi kunda MDHga a’zo mamlakatlarning 700 mingdan ziyod fuqarolari ‘soyada’ qolishda davom etmoqda”, — deyiladi politsiya xabarida.
Bundan tashqari, Gorovoyning so‘zlariga ko‘ra, 2021-yil chet el fuqarolari tomonidan sodir etilgan jinoyatlar soni 5 foizga o‘sgan. Gap jamoatchilik tartibining buzilishi va ommaviy mushtlashuvlar haqida bormoqda.
Shuningdek, Rossiyada mehnat muhojirlari majburiy daktiloskopiyadan o‘tishi ma’lum qilindi. Bunday qoida Rossiyaga 90 kundan ortiq muddatga kelgan chet elliklar uchun taalluqli bo‘ladi. U 29-dekabrdan kuchga kiradi.
Avvalroq Rossiya prezidenti Vladimir Putin Rossiyaga kelgan mehnat muhojirlarini majburiy daktiloskopik (barmoq izlari bilan) ro‘yxatdan o‘tkazish to‘g‘risidagi qonunni imzolagandi. Shuningdek, endilikda Rossiyada ommaviy mushtlashuvlarda qatnashadigan muhojirlar mamlakatdan chiqarib yuboriladi.
Mavzuga doir:
- Rossiyada muhojirlar uchun rus tilidan imtihon o‘tkazishning yangi qoidalari joriy etildi
- Rossiya qurilish maydonlariga 2024-yilga qadar 5 mln mehnat muhojirini jalb etish zarurligi ma’lum qilindi
- Rossiya Ichki ishlar vazirligi mehnat migrantlari uchun elektron patentlarni joriy etish rejalarini e’lon qildi
Izoh (0)