«Адолат» партиясининг Ўзбекистон Президенти сайловида иштирок этадиган номзоди тавсия қилинди

2021 йилнинг октябрида бўлиб ўтадиган Ўзбекистон Президентлик сайловида «Адолат» социал-демократик партияси томонидан партия сиёсий кенгаши раиси Баҳром Абдуҳалимов номзод сифатида иштирок этади. Бу ҳақда 5 август, пайшанба куни «Адолат» СДП марказий кенгашининг навбатдан ташқари плениумида маълум қилинди, дея хабар бермоқда «Дарё» мухбири.

Пленумда кенг жамоатчилик ичига чуқур кириб бориш, фуқароларнинг сиёсий ва ҳуқуқий саводхонлигини янада ошириш, электорат манфаатларини ҳимоя қилишга фаолроқ киришиш, сайловларда юқори сиёсий савия билан иштирок этиш каби муҳим масалаларга эътибор қаратилди. Мазкур масалаларни ҳал этишни ўз зиммасига олган ҳолда партиянинг мазкур сайловда қатнашиши тўғрисида плениум қарори қабул қилинди.

Маълумот учун, Баҳром Абдуҳалимов 1959 йил 27 февралда Тошкент шаҳрида таваллуд топган. Тошкент давлат университетини тамомлаган (1981 йил). Ўзбекистон Фанлар академияси Шарқшунослик институтида кичик, катта илмий ходим, бўлим бошлиғи, илмий котиб, илмий ишлар бўйича директор ўринбосари, директор, Ўзбекистон Президенти давлат маслаҳатчиси лавозимларида ишлаган. Тарих фанлари доктори, Марказий Осиё тарихи ва шарқшунослик соҳасидаги олим.

У 2011—2020 йилларда Фанлар академияси вице-президенти лавозимида ишлаган. 2020 йилнинг октябрида «Адолат» СДП сиёсий кенгаши раиси этиб сайланган.

Қонунчиликка кўра, партия юқори органи унинг номзодини маъқуллаши, Республикадаги жами сайловчиларнинг камида 1 фоизи номзодни қўллаб-қувватлаб имзо қўйиши керак бўлади.

Ўзбекистон Президенти сайлови кампаниясига 23 июль куни старт берилди. Мазкур сайловларда 5 та партия – «Адолат» СДП, «Миллий тикланиш» ДП, ЎзЛиДеП, ХДП ва Ўзбекистон Экологик партияси ўз номзодини илгари суриш ҳуқуқига эга.

Аввалроқ Ўзбекистон президентлик сайловида Экопартия томонидан партия марказий кенгаши ижроия қўмитаси раиси Нарзулло Обломуродов номзод сифатида қатнашиши маълум бўлганди. «Адолат» СДП 2021 йилги президентлик сайловида иккинчи бўлиб ўз номзодини кўрсатди.

Президент сайлови 24 октябрь куни ўтказилади. Сайловга жами 300 миллиард сўм, ҳар бир номзодга эса 3 миллиард сўмдан ажратилади.