2021 йилнинг март ойида Тошкентнинг Янгиҳаёт туманида аёл ўзининг 8 ойлик боласини 10 минг долларга сотаётганида қўлга олиниб, ҳолат юзасидан жиноят иши қўзғатилганди. Олий суд матбуот хизматининг маълум қилишича, аёлга 5 йилга озодликдан маҳрум қилиш жазоси тайинланди.
Қайд этилишича, судланувчи Н.Ж. бундан икки йил аввал иссиқхонада ишлаб юрганида бир эркак билан танишиб қолган ва 2020 йилда ундан ундан ўғил фарзанд кўрган. Ўша вақтда унинг 2018 йилда туғилган фарзанди ҳам бўлган. Янги туғилган фарзанднинг отаси уни боқиш учун имконияти йўқлигини билдириб, болани бошқа бировга бериб юборишини айтган.
Судланувчи аёлнинг суд жараёнида билдиришича, дастлаб у чақалоғини бошқа бировга бериб юборишни хоҳламаган, аммо фарзандини боқиш учун имкон тополмаган. Орадан вақт ўтиб, унга 8 ойлик фарзандини 10 минг долларга сотиш таклифи тушган ва у бу таклифни қабул қилган.
Янгиҳаёт тумани васийлик ва ҳомийлик органи мутахассиси Зулфия Имомованинг сўзларига кўра, аёлдан фарзандини нега сотгани сабаби сўралганда у яшаш жойи йўқлиги, икки фарзандини боқолмаётганини, бировнинг уйида мол боқиб кун кечираётганини таъкидлаган.
Зулфия Имомованинг айтишича, аёлнинг биринчи фарзанди ҳам кимданлиги номаълум. Болаларга туғилганлик ҳақида гувоҳнома ҳам расмийлаштирилмаган. Ушбу гувоҳномалар олиб берилиб, болалар меҳрибонлик уйига жойлаштирилган.
Судда аёл ўз айбига қисман иқрор бўлган. Унга 5 йилга озодликдан маҳрум қилиш жазоси тайинланган.
Мавзуга доир:
- Самарқандда машғулотларга бирга қатнайдиган йигитдан ҳомиладор бўлиб қолган Ўзбекистон чемпиони фарзандини сотаётган вақтда қўлга тушди
- Тошкентда 13 ёшли қизини 3500 долларга сотмоқчи бўлган она ушланди
- Навоийда 3 ойлик боласини икки хонали квартирага алмашмоқчи бўлган аёл «маҳалладан берилган ижобий тавсифнома» сабаб озодликдан маҳрум этилмади
- Тошкент вилоятида 3 ёшли ўғлини 4 минг долларга сотмоқчи бўлган аёл ушланди. У бундан олдин ҳам 5 ёшли ўғлини сотиб юборган
Изоҳ (0)