Tokio—2020. Rustam Assakalov gruziyalik kurashchini yengib, chorak finalga chiqdi. Bokschi Elnur Abduraimov esa medallar uchun kurashdan chiqdi

Tokio—2020 Olimpiadasida bir qator o‘zbekistonlik sportchilar 3-avgust kuni o‘z ishtirokini o‘tkazdi.

Yunon-rum kurashi bo‘yicha -87 kg vazn toifasi vakili Rustam Assakalov 1/8 finalda gruziyalik Lasha Gobadzega qarshi kurash olib bordi. Unda O‘zbekiston vakili 6:5 hisobida g‘alaba qozonib, chorak finalga yo‘l oldi. Qayd etish kerak, Gobadze 2019-yilda -82 kg vazn toifasida Jahon chempionati g‘olibiga aylangandi.

Assakalov keyingi bosqichda xorvatiyalik Ivan Huklekka qarshi to‘qnash keladi.

Boks bo‘yicha -63 kg vazn toifasida harakat qilayotgan Elnur Abduraimov chorak finalda armanistonlik Xovxannes Bachkovga qarshi jang qildi. Unda to‘liq ustunlik Armaniston vakili tomonida bo‘ldi va yakunda Bachkov 5:0 hisobidagi g‘alabani qo‘lga kiritdi.