Samarqandda Lacetti katta tezlikdan yo‘l yoqasidagi uyga urilishi oqibatida haydovchi va yo‘lovchi vafot etdi

Samarqand viloyati Urgut tumanida Lacetti yo‘l yoqasidagi uy devoriga urildi, deya xabar bermoqda YHXBB.

Qayd etilishicha, 2021-yil 29-iyul kuni soat 16:40 larda Urgut tumani hududidan o‘tuvchi A377 Samarqand–Ayniy avtomobil yo‘lining 27-kilometrida Urgut tumani Mo‘minobod qishlog‘ida yashagan 1997-yilda tug‘ilgan haydovchi ishonchnoma orqali Lacetti avtomashinasida ketayotib, boshqaruvni yo‘qotgan.

Mashina shundan so‘ng yo‘l chetidagi uyga borib urilgan. Oqibatda haydovchi va uning yonida bo‘lgan 2005-yilda tug‘ilgan yo‘lovchi voqea joyida vafot etgan.

YTH sabablari o‘rganilganda haydovchi aholi yashash punktida belgilangan tezlikdan me’yoridan ortiq oshirgani aniqlandi.

Mazkur holat yuzasidan Urgut tumani IIO FMB Tergov bo‘limi tomonidan dastlabki surishtiruv harakatlari olib borilmoqda.

Bundan avval Andijonda Damas va ikkita Nexia ishtirokida sodir bo‘lgan YTH oqibatida 26 yoshli yo‘lovchi halok bo‘lgani, Buxoroda Nexia ag‘darildi, haydovchi va yo‘lovchi mashina tagida qolgani hamda O‘zbekistonda yanvar—iyun oylarida sodir bo‘lgan YTHlar oqibatida 954 kishi halok bo‘lgani haqida xabar berilgandi.