Tokio—2020. Tursunoy Rahimova birinchi raqamli bokschiga qarshi ringga chiqdi, dzyudochi Muhammadkarim Xurramov 1/8 finalda o‘z ishtirokini yakunladi

O‘zbekistonlik bir qator sportchilar 29-iyul kuni Tokio—2020 Olimpiadasidagi ishtirokini o‘tkazdi.

Dzyudo bo‘yicha -100 kg vazn toifasida O‘zbekiston nomidan qatnashayotgan Muhammadkarim Xurramovga dastlabki bosqichda irlandiyalik Benjamin Fletcher raqib bo‘ldi. Unda Muhammadkarim vazari bahosi bilan g‘alaba qozonib, keyingi bosqichga yo‘l oldi. 1/8 finalda Xurramov yaponiyalik Aron Volfga qarshi tatamiga chiqdi. Biroq jahon chempioni hisoblangan yaponiyalik sportchi ippon bahosi bilan Muhammadkarimni yengdi. Shu tariqa Xurramov yakkalik bahslaridagi ishtirokini yakunladi.

Boks bo‘yicha -51 kg vazn toifasida ishtirok etayotgan Tursunoy Rahimova mazkur toifaning birinchi raqamli bokschisi turkiyalik Naz Chaqiro‘g‘luga qarshi ringga ko‘tarildi. Birinchi raund to‘liq Tursunoyning ustunligida o‘tdi va hakamlar 4:1 hisobida Rahimovaning g‘alabasini qayd etdi. Ikkinchi raundda esa turkiyalik bokschi faolroq bo‘ldi va 3:2 hisobida yutdi. Teng kurashlar ostida o‘tgan uchinchi raundning so‘nggi lahzalarini Tursunoy yaxshi o‘tkazdi. Biroq yakunda hakamlar Chaqiro‘g‘luning g‘alabasini (3:2) qayd etdi.

1/16 finalda Tursunoy polshalik Sandra Drabikni yengib, o‘zbekistonlik ayol bokschilar orasida Olimpiada o‘yinida g‘alaba qozongan ilk sportchi bo‘lgandi.

Avvalroq Mirazizbek Mirzaxalilov hakamlarning tushunarsiz qarorlari sabab musobaqa bilan xayrlashgandi.