Токио—2020. Турсуной Раҳимова биринчи рақамли боксчига қарши рингга чиқди, дзюдочи Муҳаммадкарим Хуррамов 1/8 финалда ўз иштирокини якунлади

Ўзбекистонлик бир қатор спортчилар 29 июль куни Токио—2020 Олимпиадасидаги иштирокини ўтказди.

Дзюдо бўйича -100 кг вазн тоифасида Ўзбекистон номидан қатнашаётган Муҳаммадкарим Хуррамовга дастлабки босқичда ирландиялик Бенжамин Флетчер рақиб бўлди. Унда Муҳаммадкарим вазари баҳоси билан ғалаба қозониб, кейинги босқичга йўл олди. 1/8 финалда Хуррамов япониялик Арон Вольфга қарши татамига чиқди. Бироқ жаҳон чемпиони ҳисобланган япониялик спортчи иппон баҳоси билан Муҳаммадкаримни енгди. Шу тариқа Хуррамов яккалик баҳсларидаги иштирокини якунлади.

Бокс бўйича -51 кг вазн тоифасида иштирок этаётган Турсуной Раҳимова мазкур тоифанинг биринчи рақамли боксчиси туркиялик Наз Чақирўғлуга қарши рингга кўтарилди. Биринчи раунд тўлиқ Турсунойнинг устунлигида ўтди ва ҳакамлар 4:1 ҳисобида Раҳимованинг ғалабасини қайд этди. Иккинчи раундда эса туркиялик боксчи фаолроқ бўлди ва 3:2 ҳисобида ютди. Тенг курашлар остида ўтган учинчи раунднинг сўнгги лаҳзаларини Турсуной яхши ўтказди. Бироқ якунда ҳакамлар Чақирўғлунинг ғалабасини (3:2) қайд этди.

1/16 финалда Турсуной польшалик Сандра Драбикни енгиб, ўзбекистонлик аёл боксчилар орасида Олимпиада ўйинида ғалаба қозонган илк спортчи бўлганди.

Аввалроқ Миразизбек Мирзахалилов ҳакамларнинг тушунарсиз қарорлари сабаб мусобақа билан хайрлашганди.