Prezident Shavkat Mirziyoyev 29-iyul kuni Toshkent viloyati Olmaliq shahriga tashrif buyuradi. Bu haqda davlat rahbarining matbuot kotibi xabar berdi.
Ma’lum qilinishicha, O‘zbekiston Prezidenti kon-metallurgiya kombinati konlari negizida rangli va qimmatbaho metallar ishlab chiqarishni kengaytirish borasidagi ishlar bilan tanishadi.
Kombinatda mamlakat kon sanoatidagi yana bir yirik loyiha — “Yoshlik I” konini o‘zlashtirish loyihasi amalga oshirilmoqda. Ta’kidlanishicha, davlat rahbari ushbu loyiha doirasidagi yangi quvvat — 3-mis boyitish fabrikasi qurilishiga tamal toshi qo‘yadi.
Eslatib o‘tamiz, Prezident Shavkat Mirziyoyev 2017-yilning 11-avgust kuni Olmaliq shahriga tashrif buyurgandi. O‘shanda “Olmaliq kon-metallurgiya kombinati rivojlanishining ikkinchi bosqichi” loyihasi bo‘yicha ishlarni boshlashga bag‘ishlangan tantanali marosim bo‘lib o‘tgan.
Izoh (0)