“Tolibon” jangarilari Afg‘onistonning Bag‘lon viloyatidagi elektr uzatish liniyalari ustunlarini portlatib, Kobul va uning atrofidagi viloyatlarni elektrsiz qoldirdi. Bu haqda Afg‘onistonning “Breshna” milliy energetika kompaniyasiga tayanib, “Interfaks” xabar berdi.
“Bag‘lon viloyatining Kelagay aholi punktidagi elektr uzatish minoralariga zarar yetgani sababli Kobulga va bir qator viloyatlarga import qilinadigan elektr energiyasini yetkazib berish to‘xtatildi. Kompaniyaning texnik xodimlari muammoni hal qilishga va vaziyat yaxshilanishi bilan poytaxtga va ushbu viloyatlarga elektr energiyasini qayta ulashga harakat qilmoqda”, — deyiladi xabarda.
Afg‘oniston elektr energiyasiga bo‘lgan ehtiyojini qo‘shni O‘zbekiston, Tojikiston va Turkmanistondan elektr energiyasini import qilish orqali qoplaydi. Davomiy to‘qnashuvlarda jangarilar vaqti-vaqti bilan elektr uzatish liniyalari ustunlarini nishonga olmoqda.
Afg‘oniston Milliy armiyasining matbuot markazi bir kun ichida “Tolibon”ning 187 jangarisi o‘ldirilgani haqida xabar berdi. Kun davomida Kunar, Luvgar, G‘azni, Xost, Qandahor, Uruzgan, Faryob, Balx, Juzjon, Samangan, Helmand, Toxar, Qunduz, Bag‘lon va Kapisa viloyatlarida faol jangovar harakatlar amalga oshirilgan.
AQSh harbiylari ushbu hafta “Tolibon”ga qarshi kurashayotgan Afg‘oniston hukumat kuchlarini havodan qo‘llab-quvvatlash uchun samolyotlar va dronlarni qo‘lladi.
“So‘nggi kunlarda odamlar tomonidan boshqariladigan qurilmalar hamda uchuvchisiz uchish apparatlari yordamida aviazarbalar amalga oshirildi”, — dedi AQSh davlat departamenti vakili mayor Robert Lodevik. U operatsiyalarning boshqa tafsilotlarini keltirmadi.
O‘z navbatida, AP nashri reydlarda qatnashgan samolyotlar Afg‘oniston tashqarisidagi aerodromlardan uchirilganini ta’kidlamoqda, chunki AQSh allaqachon Afg‘onistondan jangovar samolyotlarini olib chiqib ketgan.
AP qayd etishicha, Qo‘shma Shtatlar havo hujumlarini o‘tgan hafta boshlagan. Amerika vakillari ushbu zarbalarning nishoni “Tolibon” pozitsiyalari va ular qo‘lga kiritgan harbiy texnikalar ekanini aytgan.
Avvalroq “Tolibon” hujumlarni to‘xtatmasa, AQSh ularga aviazarbalar berishda davom etishini ma’lum qilgan edi.
Afg‘onistondan Amerika qo‘shinlari olib chiqila boshlangandan so‘ng, “Tolibon” Kobul, Qandahor, Mozori-Sharif kabi shaharlarga qator yirik hujumlar uyushtirdi, ammo ularni qo‘lga kirita olmadi. O‘tgan hafta harakat vakillari mamlakat chegaralarining 90 foizini nazorat qilayotganini ma’lum qildi. BMTning ta’kidlashicha, “Tolibon” so‘nggi 20 yil ichidagi eng ko‘p hududlarni o‘z nazoratiga olgan.
Izoh (0)