Yaponiyaning Tokio shahri mezbonlik qilayotgan Olimpiya o‘yinlarida o‘zbekistonlik sportchilar 28-iyul kungi chiqishlarini yakunladi.

Foto: “Daryo” / Husan Sobitov

Dzyudo

-70 kg vazn toifasida harakat qilgan Gulnoza Matniyozova 1/16 finalda chadlik Demos Memnuloum ustidan chiroyli g‘alabaga erishdi. Biroq 1/8 finalda niderlandiyalik Sanne Daykka imkoniyatni boy berib qo‘ydi.

O‘zbekiston dzyudo terma jamoasining yetakchisi Davlat Bobonov (-90 kg) ham shu kuni o‘z janglarini o‘tkazdi. Dastlabki bosqichda italiyalik Nikolas Mungayni taslim etgan sportchi nimchorak finalda ukrainalik Nyabali Kejaudan ustun keldi. Chorak finalda Davlat 21 yoshli gruziyalik sportchi Lasha Bekauriga imkoniyatni boy berdi (bu yosh iqtidor egasi yakunda chempion bo‘ldi) va bronza uchun kurashga yo‘l oldi.

O‘tish bahsida Bobonovga notanish bo‘lmagan raqib ispaniyalik Nikolos Sherazadishvili duch keldi. Unda o‘zbekistonlik sportchi zafar quchib, Jahon chempionati finalidagi mag‘lubiyat revanshini oldi. Bronza medali uchun bahs turkiyalik Mihael Zgankka qarshi kechdi. 24 yoshli dzyudochi ikkinchi daqiqa o‘tib borayotganda ippon bahosi bilan bellashuvni chiroyli yakunladi va O‘zbekiston delegatsiyasiga ikkinchi medalni taqdim etdi.

Foto: Getty Images

Olimpiya o‘yinlarida keyingi kunlari yana uch nafar o‘zbekistonlik dzyudochi tatamiga chiqadi. Shuningdek, O‘zbekistonlik dzyudochilar jamoaviy bahslarda ham ishtirok etadi.

Boks

28-iyul kuni ikki nafar o‘zbekistonlik bokschi ringga ko‘tarildi. Avvaliga -57 kg vazn toifasida amaldagi jahon chempioni Mirazizbek Mirzaxalilov bahsga kirishdi. 1/8 finalda irlandiyalik Kyort Uokerga qarshi jang qildi va katta ustunlikka ega bo‘lgan bo‘lsa ham hakamlarning g‘alati qarorlari tufayli ishtirokni yakunladi.

Foto: Getty Images

Hakamlarning qarori borasida kelib chiqishi irlandiyalik bo‘lgan boks tahlilchisi Teylor Higgins shunday fikr bildirdi.

Dahshatli qaror. Kyort Uokerga sovg‘a qilishdi, 1-raundda yutgan edi lekin 2 va 3-raundlarda toza yutqazdi. Jahon chempioni Mirazizbek Mirzaxalilov Tokio—2020 Olimpiadasidan chiqib ketdi va bizni bir nechta fantastik jangdan mahrum qilishdi.

Men irlandiyalikman, men uchun irlandiyalik bokschining g‘alabasidan kattaroq narsa yo‘q. Biroq Kyort bu jangni yutmadi, bu aniq va tushunarli. U Mirzaxalilovga qarshi turish uchun fantastik tarzda harakat qildi, biroq bu g‘alaba uchun yetarli emas.

Teylor Higgins, boks tahlilchisi

-81 kg vazn toifasida harakat qilgan Dilshod Ro‘zmetov esa asli kelib chiqishi kubalik bo‘lgan Ozarbayjon vakili Alfonso Domingesga imkoniyatni boy berib qo‘ydi va Olimpiya o‘yinlaridagi ishtirokni yakunladi.

Shu tariqa o‘zbekistonlik bokschilar orasida Tokio—2020 Olimpiadasini tark etganlar soni to‘rt nafarga yetdi. 8 nafar bokschi esa o‘z yurishini davom ettirmoqda.