Shavkat Mirziyoyev Toshkent shahridagi 21-mehribonlik uyiga tashrifi davomida sohada yangi tizim yaratilishi haqida ma’lum qilgandi.

Foto: Prezident matbuot xizmati

Prezidentning ta’kidlashicha, bu tizim orqali kelgusida ushbu o‘g‘il-qizlar orasidan “Temurbeklar maktablari” o‘quvchilari va Jamoat xavfsizligi universiteti tinglovchilari, O‘zbekistonning chinakam posbonlari yetishib chiqadi.

“Oliy ta’lim vazirligi, Turizm va sport vazirligi viloyat hokimlari bilan birga, bir hafta muddatda har bir mehribonlik uyi va bolalar shaharchasiga 2 tadan oliygoh va sport maktabini biriktiradi.

Jumladan, Yunusobod tumanidagi 21-son mehribonlik uyiga Axborot texnologiyalari universiteti va Moliya instituti, Chilonzordagi 22-son mehribonlik uyiga Jahon tillari universiteti va Toshkent pedagogika universiteti biriktiriladi.

Birgina misol, Chirchiq shahridagi 14-sonli mehribonlik uyida Inxa universiteti bilan yangi tizim yaratilgan.

Shu bois biriktirilgan rektorlar mehribonlik uylariga tarbiyachilar tayyorlash, kutubxona fondini boyitish, bolalarni axborot texnologiyalari, xorijiy tillar, aniq va tabiiy fanlarga o‘rgatish va ularning kelgusida oliygohlarga kirishiga ko‘maklashish muhitini shakllantirishga, teatr va konsertlar tashkil etishga mas’ul va javobgar bo‘ladilar”, – deydi Prezident.

Davlat rahbarining qayd etishicha, oliygohlarning yetakchi professor-o‘qituvchilari haftada kamida ikki kun ushbu to‘garaklarga kelib, bolalarni o‘qitib beradi. Buning uchun ularga alohida ustama to‘lanadi.

“Milliy gvardiya, Turizm va sport vazirligi sport federatsiyalari bilan birga ikki hafta muddatda mehribonlik uylari tarbiyalanuvchilari uchun yakka kurash, futbol, suzish, tennis, shaxmat kabi sport to‘garaklarini tashkil etadi.

Viloyat hokimlari bir oy muddatda mehribonlik uylaridagi bolalarning sport bilan shug‘ullanishlari uchun barcha sharoitlarni yaratib berish, zarur sport anjomlari bilan ta’minlashga shaxsan mas’ul bo‘ladilar.

Turizm va sport vazirligi, Milliy gvardiya viloyat hokimlari bilan birga bir hafta muddatda har yili yoz va qish mavsumlarida mehribonlik uylari tarbiyalanuvchilari hamda vasiylik, homiylik va patronatdagi bolalar uchun Buxoro, Samarqand, Xiva, Shahrisabz, Qo‘qon, Termiz kabi qadimiy shaharlarga sayohat dasturini tasdiqlab, amalga oshirsin”, – dedi Shavkat Mirziyoyev.

Bundan avval Shavkat Mirziyoyev mehribonlik uylarini Milliy gvardiya mas’ulligiga o‘tkazishni taklif qilgani haqida xabar berilgandi.