Тошкент вилоятининг Янгийўл туманида пора эвазига фермер хўжалигининг 6 сотих ерини олиб беришни ваъда қилган шахс ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, фуқаро А.Ч. бошқа бир фуқаро Қ.га ўзини гўёки «В» фермер хўжалиги раҳбари деб таништириб, унга хўжаликнинг суғориладиган ва балл бонитети юқори бўлган ер майдонидан 6 сотихини 9 000 долларга сотишни ваъда қилган.
Ваколатли танишлари орқали ҳужжатларни тайёрлаб бериш эвазига олдиндан 3 000 долларини олган вақтида департаментнинг Тошкент вилояти бошқармаси томонидан ДХХ билан ҳамкорликда Янгийўл туманида ўтказилган тезкор тадбирда ашёвий далиллар билан ушланган.
Мазкур ҳолат юзасидан Жиноят кодексининг 168-моддаси (фирибгарлик) ва 28-, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
Бундан аввал Сурхондарёда ҳокимлик захирасида бўлган ерни 70 миллион сўмга сотмоқчи бўлган шахс ушлангани, Бўстонлиқда от спортига ажратилган 25,4 гектар ерни 1,5 миллион долларга сотмоқчи бўлган шахс қўлга олингани, Сурхондарёда 50 сотих ерни ўзига тегишли эканлигига ишонтириб, 150 миллион сўмга сотмоқчи бўлган шахс ушлангани ҳақида хабар берилганди.
Изоҳ (0)