Samarqand viloyatidan Qashqadaryoning Chiroqchi tumaniga kelib, tumanning Sho‘rquduq qishlog‘ida ish boshlagan shifokorga prezident qaroriga ko‘ra 30 million so‘m rag‘bat puli to‘lab berildi. Bu haqda “Daryo”ga viloyat Sog‘liqni saqlash boshqarmasi axborot xizmati rahbari Nuriddin Egamov xabar berdi.
Ta’kidlanishicha, samarqandlik yosh shifokor Islom G‘aniyev Chiroqchi tumanidagi Sho‘rquduq oilaviy shifokorlik punktida 2021-yilning fevral oyida ish boshlagan.
“Boshqarma boshlig‘i Ravshan Tulakovning shaxsan o‘zi shu yosh yigit bilan suhbatlashib, unga viloyatda ishlash taklifini bergandi. Yaxshi maosh, yashash uchun qulay shart-sharoit va rag‘bat puli va’da qilib, uning Chiroqchi tumanida ish boshlashiga erishgandi. Bugungi kunga kelib shifokor yigit Ravshan Tulakovning taklifiga xo‘p deganidan xursand. Unga nafaqat yaxshi maosh, kecha 30 million so‘m rag‘bat puli ham to‘lab berildi”, — deydi boshqarma axborot xizmati rahbari Nuriddin Egamov.
Nuriddin Egamovning qo‘shimcha qilishicha, viloyatda Islom G‘aniyevdan tashqari, yana to‘rt nafar shifokorga 30 million so‘mlik rag‘bat puli to‘lab berilgan.
Ma’lumot berilishicha, Qashqadaryoga qo‘shni viloyat Samarqandning Past Darg‘om tumani “Gumbaz” mahallasidan kelib ishlayotgan Islom G‘aniyev ayni kunda 28 yoshda. U 2019-yil Samarqand tibbiyot institutini tamomlagan. Yosh oila sohibi.
“Olis hududda ishlash bo‘yicha shartnomani viloyatimizda birinchilardan bo‘lib imzolagan Islom Sho‘rquduq oilaviy shifokorlik punktida 1,5 stavka oilaviy shifokor hamda hududdagi Tez tibbiy yordam shoxobchasida navbatchi shifokor sifatida ishlamoqda. Unga bu rag‘batlardan tashqari, ijara to‘lovi ham to‘lab berilmoqda. Yosh shifokor 30 million so‘mni eskirib qolgan Matiz mashinasi o‘rniga yangi avtomashina olishga sarflash niyatida ekanligini ma’lum qildi”, — deydi Nuriddin Egamov.
Qayd etilishicha, viloyatda uzoq hududlardan kelib mehnat qilayotgan shifokorlar soni sakkiz nafarga yetgan.
Izoh (0)