Tel-Avivdagi universitet tadqiqotchilari dunyodagi eng mitti elektron qurilmani yaratdi. Ular bor va azot qatlamlaridan elektron ma’lumotlarni saqlashga qodir yupqa ikki o‘lchamli plyonkani ixtiro qilgan, deb xabar beradi Hi-Tech.Mail.ru.

Foto: SciTech Daily

Oddiy elektron qurilmalarda millionlab atomlardan tarkib topgan mitti kristallardan foydalaniladi. Ikkita atom qalinligicha keladigan natijaga erishish uchun olimlar elektronlarni kvant-mexanik tunnellashtirishdan foydalangan. Ushbu texnologiya ma’lumotni materialning yupqa qavati orqali tashish imkonini beradi.

“Miniatyurizatsiya zamonaviy elektron qurilmalarni yaxshilashga xizmat qilishiga umid qilamiz va bu kelajak gadjetlarida ma’lumotlarni boshqa original usullarda boshqarishga imkon beradi”, — deya ta’kidlaydi mutaxassislar.

Olimlarning so‘zlariga ko‘ra, yangi texnologiya nafaqat yangi kompyuter devayslarining paydo bo‘lishiga, balki detektorlar, energiyani to‘plash va qayta ishlash, shuningdek, yorug‘lik bilan o‘zaro ta’sirlashuvchi qurilmalarning yaratilishiga xizmat qiladi.

Avvalroq Samsung o‘ta yuqori tiniqlikka ega displey yaratgani, BOE kompaniyasi smartfonlar va boshqa qurilmalarning ekranlari bilan o‘zaro aloqani ta’minlashning qiziqarli variantini taqdim etgani to‘g‘risida xabar berilgandi.