19-aprel kuni Samarqand viloyati Pastdarg‘om tumani yashovchi erkak mast holda qaynonasini o‘roq bilan urib o‘ldirdi. Bu haqda viloyat prokuraturasi xabar berdi.
Ma’lum qilinishicha, 19-aprel kuni Pastdarg‘om tumanida yashovchi A.B. ismli erkak mast holatda sobiq turmush o‘rtog‘ining Samarqand tumani “Qaynama” MFYdagi uyiga farzandini ko‘rishga kelgan. Biroq qaynonasi uni farzandi bilan uchrashishiga qarshilik qilgani oqibatida yuzaga kelgan o‘zaro janjal davomida A.B. o‘zi bilan olib kelgan o‘roq bilan ayolning ko‘krak va bel sohalariga qasddan urgan.
Hayot uchun xavfli bo‘lgan tan jarohati yetkazilishi oqibatida jabrlanuvchi hodisa joyida vafot etgan.
Dastlabki ma’lumotlarga ko‘ra, ayolning o‘limi ko‘krak va bel sohasiga 12 marotaba teshib o‘tuvchi sanchilgan-kesilgan yarasidan o‘tkir qon yo‘qotishidan kelib chiqqan.
Voqea joyiga viloyat prokurori, Samarqand tuman prokurori, tuman IIB boshlig‘i hamda boshqa tezkor tergov guruhi a’zolari yetib kelgan.
Samarqand tuman prokurori tomonidan fuqaro A.B.ga nisbatan Jinoyat kodeksining 97-moddasi (qasddan odam o‘ldirish) 1-qismi bilan jinoyat ishi qo‘zg‘atilib, u himoya huquqi ta’minlangan holda Jinoyat-protsessual kodeksning 221-moddasi tartibida ushlangan.
Hozirda jinoyat ishi bo‘yicha Samarqand tuman prokuraturasi tomonidan dastlabki tergov harakatlari olib borilmoqda. Jinoyat ishi tergovi viloyat prokuraturasi tomonidan nazoratga olingan.
Avvalroq Termizda er qizini ko‘rishga to‘sqinlik qilgani uchun xotiniga pichoq urgani to‘g‘risida xabar berilgandi.