Қашқадарё вилоятининг Чироқчи туманида ўлдириб кетилган 25 ёшли йигитнинг қотили 23 ёшли аёл экани айтилмоқда. Бу ҳақда «Дарё» манбаси хабар берди.
Таъкидланишича, қотиллик жинояти 2021 йилнинг 29 июнь куни вилоят ИИБ ходимлари саъй-ҳаракати билан ошкор қилинган.
«ИИБ ходимларига раҳмат, улар тун-у кун меҳнат қилиб, жиноятчини топди», — дейди «Дарё» манбаси.
«Дарё» мухбирининг воқеага аниқлик киритишича, марҳум йигит қотил аёлни ёшлигидан севган. Қиз эса бошқа бировга турмушга чиққан.
«Билишимча, марҳум севган қизи бошқа бировга турмушга чиққан бўлишига қарамасдан уни қайта-қайта учрашувга чақирган. Ҳатто чиқмаса, ўтмиши ҳақида ошкор қилиш билан ҳам қўрқитган бўлиши мумкин. Шу сабабми ёки бошқа бир асос борми, аёл учрашувга чиқиб, йигитнинг кўксига пичоқ санчган», — дейди «Дарё» мухбири билан суҳбатлашган манба.
Қўшимча қилинишича, воқеа юзасидан Жиноят кодексининг 97-моддаси 1-қисми (қасддан одам ўлдириш) билан жиноят иши қўзғатилган.
Мазкур ҳолат бўйича вилоят прокуратураси ҳозирча расмий маълумот бермади.
Эслатиб ўтамиз, 2021 йил 26 июнь куни эрталаб соат 08:00 да Чироқчи туманининг «Лангар» МФЙга қарашли Тўрақул қишлоғида яшовчи 1996 йилда туғилган Ж.Н.нинг пичоқланган жасади топилгани, марҳум йигит санъаткор бўлгани ҳамда шу қишлоқнинг чеккасида дўкон юритгани, марҳумни қишлоқдошлари сўнгги марта 25 июнь куни кечки соат 23:00 да кўргани хабар берилганди.
Изоҳ (0)