Messining “Barselona”dagi so‘nggi kuni, “Paxtakor” futbolchisiga qiziqqan Belgiya klubi va vaqtlari aniq bo‘lgan “El-Klasiko”. Eng so‘nggi sport yangiliklari

Dunyo va o‘zbek sportiga oid 30-iyun kunining muhim xabarlari dayjesti bilan tanishing.

O‘zbekiston

Iroq terma jamoasi ustozi Srechko Katanets O‘zbekiston milliy terma jamoasi bosh murabbiyligiga nomzodlar qatoridan joy oldi. O‘FA sloveniyalik mutaxassis bilan muzokaralarni boshlagan, deya xabar qilmoqda “Tribuna.uz” Eronning “Tasmin” nashriga tayanib. Qayd etilishicha, Katanets olti oydan beri maoshini ololmayapti va Iroq futbol federatsiyasi ustidan FIFAga shikoyat qilgan. Iroq futboli rahbarlari Srechko bilan hisob-kitob qilib, u bilan shartnomani bekor qilmoqchi.

Superliga 12-tur o‘yinlaridagi hakamlar tayinlandi. 2—4-iyul kunlari Superliganing 12-tur uchrashuvlari bo‘lib o‘tadi. PFL uchrashuvga tayinlangan hakamlar ro‘yxatini ma’lum qildi. Turning ikkita o‘yinida (“OKMK”—“Qo‘qon-1912” va “Nasaf”—“So‘g‘diyona”) VAR tizimi ishlaydi.

“Paxtakor” himoyachisi Ibrohimxalil Yo‘ldoshevga Belgiyaning “Beersxot” klubi qiziqish bildirmoqda. Bu haqda “Championat.asia” xabar qilmoqda. Ta’kidlanishicha, Yo‘ldoshevning agentlari futbolchining Belgiyaga ketishiga qarshilik qilmoqda.

Jahon

La Liga 2021/22-yilgi mavsumi taqvimi e’lon qilindi. Mavsum 15-avgustda start olib, 2022-yilning 22-mayida yakunlanadi. Dastlabki “El-Klasiko” 24-oktabr kuni “Kamp Nou”da bo‘lib o‘tsa, Madriddagi o‘yin 20-mart kuni o‘tkaziladi.

La Liga 2021/22-yilgi mavsumi markaziy o‘yinlari:

• “Atletiko” — “Barselona” (03.10.21)
• “Barselona” — “Real” (24.10.21)
• “Real” — “Atletiko” (12.12.21)
• “Barselona” — “Atletiko” (06.02.22)
• “Real” — “Barselona” (20.03.22)
• “Atletiko” — “Real” (08.05.22)

“Yuventus” pandemiya sabab 320 million yevro yo‘qotgani ma’lum bo‘ldi. Turinliklar klubi direktorlar kengashi yig‘ilishida koronavirusning klub moliyaviy ahvoliga ta’siri haqida ham so‘z bordi. Unga ko‘ra, klubning uch mavsumdagi (2019/20, 2020/21, 2021/22) zarari 320 million yevroga baholangan.

Transfer yangiliklari

Ispaniyalik mutaxassis Rafael Benites “Everton” bosh murabbiyiga aylandi. 61 yoshli mutaxassis mersisaydliklar bilan 3 yillik shartnoma imzoladi. E’tiborlisi, Benites “Everton”ning azaliy raqibi “Liverpul” sobiq ustozi hisoblanadi. Benites Liverpulning ikkala klubida ham ishlagan tarixdagi ikkinchi murabbiyga aylandi. Birinchisi bundan 130 yil avval Uilyam Barklay ishtirokida kuzatilgan.

“Manchester Yunayted” Pol Pogba jamoani tark etadigan bo‘lsa, “Bavariya” yarim himoyachisi Leon Goretskani olib kelmoqchi, deya xabar qilmoqda Bild. Avvalroq Goretskaga “Real” va “Barselona”dan ham qiziqish borligi xabar qilingandi.

“Vulverhempton” sobiq ustozi Nunu Eshpiritu Santu “Tottenhem” bosh murabbiyiga aylanishga yaqin turibdi. Bu haqda BBC xabar berdi. Portugaliyalik mutaxassis may oyida “bo‘rilar” boshqaruvini tark etgandi.

Lionel Messi ertadan erkin agentga aylanadi. “Barselona” va argentinalik futbolchi o‘rtasidagi amaldagi shartnoma 30-iyun kuni o‘z nihoyasiga yetadi. Shu tariqa futbolchi erkin agent maqomini oladi. Biroq ko‘plab nashrlarda xabar qilinishicha, Messi katalon klubi bilan yangi bitim borasida kelishib qo‘ygan. “Barselona” Messining yangi shartnomasi detallarini La Liga va moliya tashkilotlari bilan muhokama qilmoqda. Avvalroq Messi 4 yillik yangi shartnomaga ko‘ra 240 million yevro ishlab olishi xabar qilingandi. U ikki mavsum o‘yinchi sifatida va yana ikki mavsum klubning AQShdagi elchisi sifatida faoliyat yuritadi.