Мессининг «Барселона»даги сўнгги куни, «Пахтакор» футболчисига қизиққан Бельгия клуби ва вақтлари аниқ бўлган «Эль-Класико». Энг сўнгги спорт янгиликлари

Дунё ва ўзбек спортига оид 30 июнь кунининг муҳим хабарлари дайжести билан танишинг.

Ўзбекистон

Ироқ терма жамоаси устози Сречко Катанец Ўзбекистон миллий терма жамоаси бош мураббийлигига номзодлар қаторидан жой олди. ЎФА словениялик мутахассис билан музокараларни бошлаган, дея хабар қилмоқда «Tribuna.uz» Эроннинг «Tasmin» нашрига таяниб. Қайд этилишича, Катанец олти ойдан бери маошини ололмаяпти ва Ироқ футбол федерацияси устидан ФИФАга шикоят қилган. Ироқ футболи раҳбарлари Сречко билан ҳисоб-китоб қилиб, у билан шартномани бекор қилмоқчи.

Суперлига 12-тур ўйинларидаги ҳакамлар тайинланди. 2—4 июль кунлари Суперлиганинг 12-тур учрашувлари бўлиб ўтади. ПФЛ учрашувга тайинланган ҳакамлар рўйхатини маълум қилди. Турнинг иккита ўйинида («ОКМК»—«Қўқон-1912» ва «Насаф»—«Сўғдиёна») VAR тизими ишлайди.

«Пахтакор» ҳимоячиси Иброҳимхалил Йўлдошевга Бельгиянинг «Беерсхот» клуби қизиқиш билдирмоқда. Бу ҳақда «Championat.asia» хабар қилмоқда. Таъкидланишича, Йўлдошевнинг агентлари футболчининг Бельгияга кетишига қаршилик қилмоқда.

Жаҳон

Ла Лига 2021/22 йилги мавсуми тақвими эълон қилинди. Мавсум 15 августда старт олиб, 2022 йилнинг 22 майида якунланади. Дастлабки «Эль-Класико» 24 октябрь куни «Камп Ноу»да бўлиб ўтса, Мадриддаги ўйин 20 март куни ўтказилади.

Ла Лига 2021/22 йилги мавсуми марказий ўйинлари:

• «Атлетико» — «Барселона» (03.10.21)
• «Барселона» — «Реал» (24.10.21)
• «Реал» — «Атлетико» (12.12.21)
• «Барселона» — «Атлетико» (06.02.22)
• «Реал» — «Барселона» (20.03.22)
• «Атлетико» — «Реал» (08.05.22)

«Ювентус» пандемия сабаб 320 миллион евро йўқотгани маълум бўлди. Туринликлар клуби директорлар кенгаши йиғилишида коронавируснинг клуб молиявий аҳволига таъсири ҳақида ҳам сўз борди. Унга кўра, клубнинг уч мавсумдаги (2019/20, 2020/21, 2021/22) зарари 320 миллион еврога баҳоланган.

Трансфер янгиликлари

Испаниялик мутахассис Рафаэл Бенитес «Эвертон» бош мураббийига айланди. 61 ёшли мутахассис мерсисайдликлар билан 3 йиллик шартнома имзолади. Эътиборлиси, Бенитес «Эвертон»нинг азалий рақиби «Ливерпуль» собиқ устози ҳисобланади. Бенитес Ливерпулнинг иккала клубида ҳам ишлаган тарихдаги иккинчи мураббийга айланди. Биринчиси бундан 130 йил аввал Уильям Барклай иштирокида кузатилган.

«Манчестер Юнайтед» Пол Погба жамоани тарк этадиган бўлса, «Бавария» ярим ҳимоячиси Леон Горетцкани олиб келмоқчи, дея хабар қилмоқда Bild. Аввалроқ Горетцкага «Реал» ва «Барселона»дан ҳам қизиқиш борлиги хабар қилинганди.

«Вулверҳэмптон» собиқ устози Нуну Эшпириту Санту «Тоттенҳэм» бош мураббийига айланишга яқин турибди. Бу ҳақда BBC хабар берди. Португалиялик мутахассис май ойида «бўрилар» бошқарувини тарк этганди.

Лионель Месси эртадан эркин агентга айланади. «Барселона» ва аргентиналик футболчи ўртасидаги амалдаги шартнома 30 июнь куни ўз ниҳоясига етади. Шу тариқа футболчи эркин агент мақомини олади. Бироқ кўплаб нашрларда хабар қилинишича, Месси каталон клуби билан янги битим борасида келишиб қўйган. «Барселона» Мессининг янги шартномаси деталларини Ла Лига ва молия ташкилотлари билан муҳокама қилмоқда. Аввалроқ Месси 4 йиллик янги шартномага кўра 240 миллион евро ишлаб олиши хабар қилинганди. У икки мавсум ўйинчи сифатида ва яна икки мавсум клубнинг АҚШдаги элчиси сифатида фаолият юритади.