Dunyo va o‘zbek sportiga oid 27-iyun kunining muhim xabarlari dayjesti bilan tanishing.
O‘zbekiston
Futzal bo‘yicha O‘zbekiston milliy terma jamoasi xalqaro o‘rtoqlik o‘yini doirasida Venesuelaga qarshi ikkinchi bahsni o‘tkazdi. Unda Davron Choriyevning dubli va Iloh Hamroyevning goliga mehmonlar Varlos Ventoning ikkita goli bilan javob qaytardi. Shu tariqa dastlabki o‘yinda durang (3:3) qayd etgan O‘zbekiston terma jamoasi ikkinchi bahsni g‘alaba bilan yakunladi.
Superligada 11-tur davom etmoqda. 27-iyun kungi o‘yinlarda peshqadamlar qatoridan borayotgan “Paxtakor” va “OKMK” o‘z o‘yinlarini o‘tkazdi. Toshkent klubi “Surxon”ni yirik hisobda taslim etgan (4:0) bo‘lsa, Mirjalol Qosimov shogirdlari autsayder “Andijon”ni bazo‘r yengdi (3:2).
Jahon
Moskvada futbolchi maydonda fojiali o‘lim topdiRossiya Havaskorlar ligasi uchrashuvi vaqtida futbolchi Maksim Dobrovolskiy hushini yo‘qotgan va maydonda vafot etgan. Dastlabki xulosalarga ko‘ra, futbolchining yuragi to‘xtab qolgan. Liga prezidenti Dmitriy Smirnovning ta’kidlashicha, futbolchi o‘yin qaydnomasida yo‘q bo‘lgan. U ko‘rikdan o‘tish uchun kelgani aytilmoqda. Voqea uchrashuvning dastlabki daqiqalarida yuz bergan, futbolchi hushini yo‘qotishidan oldin hech qanday jiddiy to‘qnashuv bo‘lmagan. Funksionerning qayd etishicha, unga tibbiy xodimlar tomonidan maydonda yordam ko‘rsatilgan, biroq bu foyda bermagan.
Mazkur holatga guvoh bo‘lgan marhumning do‘sti Timofey Vyatkin voqeaga oydinlik kiritdi va liga rahbarining bayonoti noto‘g‘ri ekanini aytdi. Vyatkinning ta’kidlashicha, maydonda shifokorlar bo‘lmagan, tez yordam esa 20 daqiqadan keyin kelgan. “Tibbiy xulosa hali yo‘q, biroq katta ehtimol bilan yurak to‘xtashi kuzatilgan. Xuddi Kristian Eriksen bilan bo‘lgan holatning o‘zi. Hozir u qaydnomada yo‘qligi aytilmoqda. Biroq nima farqi bor, u tibbiy yordam olishi kerak edi, stadionda esa tibbiyot xodimlari yo‘q edi”, — deydi Vyatkin.
Yevro—2020 1/8 finali 26-iyun kuni start oldi. Dastlabki ikki o‘yinda Daniya Uelsni mag‘lub etib (4:0), Italiya esa Avstriyadan ustun kelib (2:1), chorak finalga chiqdi.
Roberto Manchini qo‘l ostidagi Italiya terma jamoasi mag‘lubiyatsiz yurishini 31 o‘yinga yetkazdi va bu borada jamoa rekordini o‘rnatdi. Italyanlar Yevro—2020 da hozirga qadar 9 ta gol urdi, bu italiyaliklarning bitta Yevropa chempionatida doirasida eng yaxshi natijasining (Yevro—2000) takrorlanishi bo‘ldi.
Italiya va Avstriya jamoalari o‘rtasidagi o‘yinda (2:1) qo‘shimcha bo‘limlarda uchta gol urildi. Gollarning barchasiga qo‘shimcha bo‘limlarda maydonga tushgan futbolchilar muallif bo‘ldi. Bunaqasi Yevropa chempionatida ilk bor kuzatildi.
Transferlar haqida
“Barselona” Antuan Grizmanni sotishga tayyor, deya xabar qilmoqda Marca. Katalon klubi moliyaviy qiyinchiliklarni boshdan kechirmoqda va fransiyalik futbolchining transferi klub uchun foydali bo‘ldi. Biroq “Barselona” Grizmanni arzonga sotib yuborish niyatida emas, klub kamida unga sarflangan 120 million yevroga yaqin mablag‘ taklif qilinganda transferga rozi bo‘ladi.
“Manchester Yunayted” Eduardo Kamavinga uchun kurashga qo‘shildi. 18 yoshli futbolchiga “PSJ”, “Real” va “Arsenal”dan qiziqish bor. Qayd etilishicha, futbolchining o‘zi Parij klubiga yo‘l olish niyatida. Ingliz klubi vakillari uning agentlari bilan muzokaralarni boshlagan.
Ashraf Hakimining “Inter”dan “PSJ”ga transferi deyarli hal bo‘ldi, deya ma’lum qilmoqda Fabrisio Romano. Parijliklar Hakimi transferi uchun Milan klubiga 60 million yevro to‘laydi, shuningdek, 10 million yevro miqdorida bonus pullari ham nazarda tutilgan. Marokashlik futbolchi “PSJ” bilan 2026-yilning iyuniga qadar mo‘ljallangan shartnoma imzolaydi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)