Рекордларни янгилаётган Италия, «ёқимтой» Дания ва Москвадаги фожиа. Энг сўнгги спорт янгиликлари

Дунё ва ўзбек спортига оид 27 июнь кунининг муҳим хабарлари дайжести билан танишинг.

Ўзбекистон

Футзал бўйича Ўзбекистон миллий терма жамоаси халқаро ўртоқлик ўйини доирасида Венесуэлага қарши иккинчи баҳсни ўтказди. Унда Даврон Чориевнинг дубли ва Илоҳ Ҳамроевнинг голига меҳмонлар Варлос Вентонинг иккита голи билан жавоб қайтарди. Шу тариқа дастлабки ўйинда дуранг (3:3) қайд этган Ўзбекистон терма жамоаси иккинчи баҳсни ғалаба билан якунлади.

Суперлигада 11-тур давом этмоқда. 27 июнь кунги ўйинларда пешқадамлар қаторидан бораётган «Пахтакор» ва «ОКМК» ўз ўйинларини ўтказди. Тошкент клуби «Сурхон»ни йирик ҳисобда таслим этган (4:0) бўлса, Миржалол Қосимов шогирдлари аутсайдер «Андижон»ни базўр енгди (3:2).

Жаҳон

Москвада футболчи майдонда фожиали ўлим топди

Россия Ҳаваскорлар лигаси учрашуви вақтида футболчи Максим Доброволский ҳушини йўқотган ва майдонда вафот этган. Дастлабки хулосаларга кўра, футболчининг юраги тўхтаб қолган. Лига президенти Дмитрий Смирновнинг таъкидлашича, футболчи ўйин қайдномасида йўқ бўлган. У кўрикдан ўтиш учун келгани айтилмоқда. Воқеа учрашувнинг дастлабки дақиқаларида юз берган, футболчи ҳушини йўқотишидан олдин ҳеч қандай жиддий тўқнашув бўлмаган. Функционернинг қайд этишича, унга тиббий ходимлар томонидан майдонда ёрдам кўрсатилган, бироқ бу фойда бермаган.

Мазкур ҳолатга гувоҳ бўлган марҳумнинг дўсти Тимофей Вяткин воқеага ойдинлик киритди ва лига раҳбарининг баёноти нотўғри эканини айтди. Вяткиннинг таъкидлашича, майдонда шифокорлар бўлмаган, тез ёрдам эса 20 дақиқадан кейин келган. «Тиббий хулоса ҳали йўқ, бироқ катта эҳтимол билан юрак тўхташи кузатилган. Худди Кристиан Эриксен билан бўлган ҳолатнинг ўзи. Ҳозир у қайдномада йўқлиги айтилмоқда. Бироқ нима фарқи бор, у тиббий ёрдам олиши керак эди, стадионда эса тиббиёт ходимлари йўқ эди», — дейди Вяткин.

Евро—2020 1/8 финали 26 июнь куни старт олди. Дастлабки икки ўйинда Дания Уэльсни мағлуб этиб (4:0), Италия эса Австриядан устун келиб (2:1), чорак финалга чиқди.

Роберто Манчини қўл остидаги Италия терма жамоаси мағлубиятсиз юришини 31 ўйинга етказди ва бу борада жамоа рекордини ўрнатди. Итальянлар Евро—2020 да ҳозирга қадар 9 та гол урди, бу италияликларнинг битта Европа чемпионатида доирасида энг яхши натижасининг (Евро—2000) такрорланиши бўлди.

Италия ва Австрия жамоалари ўртасидаги ўйинда (2:1) қўшимча бўлимларда учта гол урилди. Голларнинг барчасига қўшимча бўлимларда майдонга тушган футболчилар муаллиф бўлди. Бунақаси Европа чемпионатида илк бор кузатилди.

Трансферлар ҳақида

«Барселона» Антуан Гризманни сотишга тайёр, дея хабар қилмоқда Marca. Каталон клуби молиявий қийинчиликларни бошдан кечирмоқда ва франциялик футболчининг трансфери клуб учун фойдали бўлди. Бироқ «Барселона» Гризманни арзонга сотиб юбориш ниятида эмас, клуб камида унга сарфланган 120 миллион еврога яқин маблағ таклиф қилинганда трансферга рози бўлади.

«Манчестер Юнайтед» Эдуардо Камавинга учун курашга қўшилди. 18 ёшли футболчига «ПСЖ», «Реал» ва «Арсенал»дан қизиқиш бор. Қайд этилишича, футболчининг ўзи Париж клубига йўл олиш ниятида. Инглиз клуби вакиллари унинг агентлари билан музокараларни бошлаган.

Ашраф Ҳакимининг «Интер»дан «ПСЖ»га трансфери деярли ҳал бўлди, дея маълум қилмоқда Фабрисио Романо. Парижликлар Ҳакими трансфери учун Милан клубига 60 миллион евро тўлайди, шунингдек, 10 миллион евро миқдорида бонус пуллари ҳам назарда тутилган. Марокашлик футболчи «ПСЖ» билан 2026 йилнинг июнига қадар мўлжалланган шартнома имзолайди.