Namangan va Samarqand viloyatlarida fuqarolarning firibgarlik yo‘li bilan yer sotish holatlari aniqlandi, deya xabar bermoqda Bosh prokuratura huzuridagi departament matbuot xizmati.
Qayd etilishicha, departament hamda DXXning Namangan viloyati boshqarmalari tomonidan o‘tkazilgan tezkor tadbirda, fuqaro A.N. boshqa bir fuqaro M.ning ishonchiga kirib, unga 7 000 AQSH dollari evaziga Kosonsoy tumani “Jar” MFY hududidan uy-joy qurish uchun tanishlari orqali 10 sotix yer maydoni ajratib berishni va’da qilib, oldindan 500 AQSH dollarini olgan vaqtida ashyoviy dalillar bilan ushlangan.
Xuddi shunday departament hamda DXXning Urgut tumani bo‘limlari tomonidan o‘tkazilgan tezkor tadbirda, tumandagi “N” oilaviy korxonasi rahbari S.N. bo‘lgan “J” agrofirmasi hududidagi limon yetishtirishga ixtisoslashgan 1,48 gektar yer maydonini fuqaro M.ga 12 000 AQSH dollariga firibgarlik yo‘li bilan sotmoqchi bo‘lgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Bundan avval Qarshida hokimlik zaxirasida turgan bo‘sh yerni 70 mln so‘mga sotmoqchi bo‘lgan shaxs ushlangani, Samarqand va Qarshida yerni noqonuniy ravishda sotayotgan sobiq mansabdor va hokimlik vakili ushlangani hamda Samarqandda hokimiyatdagi tanishlari orqali 40 sotix yerni 19,5 ming dollarga sotishga uringan sobiq IIO xodimi qo‘lga olingani haqida xabar berilgandi.
Izoh (0)