Toshkent viloyatining Bekobod shahridagi xonadonlarning birida istiqomat qiluvchi oila 2 tup chinor daraxtini noqonuniy kesdi. Bu haqda viloyat ekologiya va atrof-muhitni muhofaza qilish boshqarmasi xabar berdi.
Ma’lum qilinishicha, Bekobod shahar hududida chinor daraxtlari kesilayotganligi to‘g‘risida ijtimoiy tarmoqlar orqali tarqalgan video xabarga asosan Ekologiya va atrof-muhitni muhofaza qilish sohasidagi Bekobod shahar inspeksiyasi xodimlari tomonidan joyiga chiqib o‘rganish ishlari olib borilgan.
O‘rganish davomida Bekobod shahar “Birdamlik” MFY hududida ikki tup, shundan bir tupi qurib qolgan chinor daraxti tegishli ruxsatnomasiz, shu ko‘chada joylashgan xonadonning tom qismiga shoxlari sinib tushayotganligi sababli xonadon egalari tomonidan tag qismidan kesib tashlangani aniqlangan.
Qonunbuzar fuqarolarga nisbatan “O‘simliklar dunyosini muhofaza qilish to‘g‘risida”gi qonuning 37-moddasi talablari buzilishiga yo‘l qo‘yilganligi uchun Ma’muriy javobgarlik to‘g‘risidagi kodeksning 79-moddasiga (daraxtlar, butalar, boshqa o‘rmon o‘simliklari va nihollarni g‘ayriqonuniy ravishda kesish, shikastlantirish yoki yo‘q qilish) asosan 2 million 450 ming so‘m jarima va 128 million 625 ming so‘m tabiatga yetkazilgan zarar hisob-kitob qilingan.
Ayni paytda ulardan sud tartibida undirish choralari ko‘rilmoqda.
Eslatib o‘tamiz, Shavkat Mirziyoyevning 3-fevraldagi farmoni bilan O‘zbekistonda daraxt va butalarni kesishga o‘rnatilgan moratoriy muddati 2021-yil oxirigacha uzaytirilgan. Shuningdek, daraxtlarni noqonuniy kesganlik uchun jarima miqdori ikki baravarga oshirilgan.
Mavzuga doir:
Izoh (0)