Madaniy meros agentligida O‘zbekiston bosh vazirining o‘rinbosari, Turizm va sport vaziri Aziz Abduhakimov Madaniy meros agentligi markaziy apparatining boshqaruv xodimlari, Ilmiy-ekspert kengashining a’zolari bilan uchrashdi.
Unda Aziz Abduhakimovning qayd etishicha, Toshkent shahrining Navoiy, Shota Rustaveli ko‘chasidagi binolarni saqlash, ularning tarixiy qimmatini aniqlab ro‘yxatini shakllantirish kerak.
Shuningdek, bosh vazir o‘rinbosari arxeologik obyektlar joylashgan yerlardan boshqa maqsadlarda ham foydalanilayotganini aytib o‘tdi.
“Afsuski, Qoraqalpog‘iston Respublikasi va Xorazm viloyatiga arxeologik obyektlarning ahvoli o‘rganish uchun borilganda ulardan foydalanish jarayonida qonunbuzarlikka yo‘l qo‘yilganlik holatiga duch kelindi. Ayrim arxeologik obyektlar joylashgan yerlardan ekin maydoni sifatida foydalanish holatlari aniqlandi.
Madaniy meros agentligi mana shunday qonunbuzarlik holatini aniqlagani zahoti Respublika prokuraturasi organlariga murojaat etishi hamda zarur chora-tadbirlarni ko‘rishi shart.
Poytaxtning XX asrning 60–70 yillarda o‘ziga xos qiyofasi yaratilishida xizmat qilgan mayolikalar ro‘yxatini tuzish, ularni asossiz ravishda didsizlik bilan bo‘yashning oldini olish maqsadida jurnalist va blogerlar, jamoatchilik bilan uzviy aloqa bog‘lanishi zarur”, – dedi u.
Bundan avval Xalqaro ekspeditsiya Qoraqalpog‘istonning tarixiy yodgorliklarini o‘rgangani, Toshkentdagi Mingo‘rik yodgorligi yonida IIBB Ma’naviyat va ma’rifat markazi binosini qurish ishlari to‘xtatilgani hamda Surxondaryoda “stoyanka” qurish uchun arxeologik hududdan tuproq qazigan tadbirkor javobgarlikka tortilishi haqida xabar berilgandi.
Izoh (0)