Қаршидан Тошкентга автомобиль юкхонасида олиб кетилаётган истеъмолга яроқсиз гўшт маҳсулотлари йўқ қилинди. Бу ҳақда ИИВ ЙҲХББ ахборот хизмати хабар берди.
Маълум қилинишича, 22 июнь куни соат 01:30 ларда Қашқадарё вилояти Чироқчи тумани ҳудудида жойлашган «Умакай» ЙПХ масканида хизмат олиб борган ЙПХ ходими томонидан Қарши—Тошкент йўналиши бўйлаб ҳаракатланиб келган Kia Carnival русумли автомобиль тўхтатилиб, текширилган. Текширув давомида машина юкхонасида тўқ қизил рангли, нўмалум ҳайвонга тегишли бўлган жами оғирлиги 460 килограмм гўшт маҳсулотлари борлиги аниқланган.
Аниқланган маҳсулотлар Чироқчи тумани ветеринария бўлимининг лабораториясида текширилган ва улар истеъмолга яроқсизлиги аниқланиб, белгиланган тартибда йўқ қилинган.
Аввалроқ Бухородан Тошкентга 3 тоннага яқин истеъмолга яроқсиз гўшт олиб кетилаётгани аниқлангани, Самарқандда истеъмолга яроқсиз бўлган қарийб 200 килограмм, Қашқадарёда эса 600 килограмм шундай гўшт йўқ қилингани ҳақида хабар берилган эди.
Изоҳ (0)