Shavkat Mirziyoyevning “Respublika hududlarida mebelsozlik sanoatini rivojlantirishga qaratilgan chora-tadbirlar to‘g‘risida”gi qarori qabul qilindi.
Qarorga ko‘ra, Investitsiyalar va tashqi savdo vazirligi hamda boshqa manfaatdor vazirlik va idoralar bilan birgalikda ikki oy muddatda quyidagilarni nazarda tutuvchi “2021—2024-yillarda O‘zbekistonda mebel va yog‘ochsozlik sanoatini rivojlantirish dasturi” loyihasini tasdiqlash uchun Vazirlar Mahkamasiga kiritadi:
- respublika hududlarida qurilayotgan ko‘p kvartirali uy-joylarni aholining talabidan kelib chiqqan holda birinchi navbatda, mahalliy mebel mahsulotlari bilan jihozlash bo‘yicha iste’mol kreditlarining yangi turlari va paketlarini joriy qilish;
- 2021—2024-yillarda respublika hududlaridagi davlat tashkilotlarining, shu jumladan, maktabgacha ta’lim, umumiy o‘rta va o‘rta maxsus ta’lim hamda sog‘liqni saqlash muassasalarining mebel jihozlarini yangilash grafigini tasdiqlash;
- mebel sanoatining barcha yo‘nalishlarida xomashyo sifatida foydalaniladigan daraxt turlarini respublika iqlim sharoitini hisobga olgan holda yetishtirish hamda respublika mebel sanoatida xomashyo sifatida foydalaniladigan daraxt turlari plantatsiyalarini barpo etish;
- xorijiy davlatlardagi (Xitoy, Turkiya hamda Yevropa davlatlari) yirik mebel ishlab chiqaruvchi kompaniyalar tomonidan respublikada ishlab chiqarish quvvatlarini ishga tushirish;
- Innovatsion rivojlanish vazirligi “O‘zkimyosanoat” AJ bilan birgalikda respublika hududlarida MDF plitalari, HPL panellar, hamda mazkur qarorning ilovasida ko‘rsatilgan xomashyo, ehtiyot qismlar, furnitura va aksessuarlar ishlab chiqarishga qaratilgan loyihalarni amalga oshirish.
Qarorga muvofiq, 2021—2022-yillarda qishloq xo‘jaligida foydalanishdan chiqib ketgan jami 3173 gektar zaxiradagi yerlarda hamda o‘rmon fondining jami 1 327 gektar tog‘oldi va adir yerlarida yong‘oq, chinor, shumtol, qayrag‘och hamda boshqa mebelbop daraxt turlari ekiladi.
Mazkur plantatsiyalarni tashkil etish uchun jami 2 783 600 dona ko‘chat yetishtirish nazarda tutilgan.
Bundan avval O‘zbekistonda yog‘och importi hajmi kamaytirilishi hamda O‘zbekistonda daraxt ekib, parvarish qilmagan mutasaddi tashkilotlarni jarimaga tortish taklif qilingani haqida xabar berilgandi.
Izoh (0)